Opinion
Ont anam?
Dempuèi mai de setanta ans, la planeta Tèrra a atrapat la gripa. Pas una gripeta. Non! Una gripassa! E figuratz-vos que s’es mesa a tremolar. Tremola que tremolaràs; tremolaira devendràs! E tremolèt talamai fòrt aqueste estiu que los vilatges de Turquia, del Marròc, de Libia s’escranquèron. E quora la Tèrra se fendascla, lo buf de la vida se fendascla tanben!
A de fèbre la Tèrra, monta sa temperatura. E anatz pas pensar qu’un supositòri, cada matin, la li farà passar! Es pas de li pausar de ventosas que la li farà davalar! Son pas los cataplasmes a la mostarda que li faràn baissar la temperatura.
Dempuèi d’annadas lo GIEC, sabètz lo GIEC, tira la campaneta quora la temperatura de la planeta monta. E per luchar contra lo CO2 dison que res non val la Còp! Pas la Cooperativa! Non! E de Còps n’avèm agut de braves còps. Ne sèm a 28 còps. Aquesta Còp se debana al Qatar. Es qu’aquelas Còps valon vertadièrament lo còp?
Se la temperatura de la planeta monta encara, veirètz, un jorn aicesta se va botar a tossir e a escupir. La planeta Tèrra escupirà talamai fòrt que de milions d’òmes e de femnas se retrobaràn sus Mars. Vesètz la tèsta de Mars quora veirà arribar totes aqueles tropèls de migrants climatics. De que devendràn totes aqueles Marcians novèls? Es que Mars marcejarà encara?
La planeta Tèrra tossirà e escopirà talamai fòrt que de milions d’òmes e de femnas se retrobaràn sus la Luna. Pensatz a Prudon de la Luna quora veirà arribar tota aquela tropelada de migrants climatics? De que devendràn tot aqueles Lunatics? Es que la Luna lunejarà encara?
Los paures umans demorats sus Tèrra repotegaràn e volràn eles tanben ganhar la Luna o Mars. Faràn tot per que la planeta tossiguèssi, escopiguèsse encara mai fòrt. Per aquò far, l’ajudaràn a se rescaufar, a cremar sas forèsts, a assecar sos rius, a fondre sos glacièrs, a empudesinar son aire e entrebolar son aiga.
E se i arriban pas, segur, demandaràn ajuda a l’Intelligéncia Artificiala. A l’I.A. que dison. I.A! Iii!AAn! Iiii! AAAnn! Iiiiiii! AAAAnnnn!
Bogres d’ases!
Clamenç umorista occitan.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari