Buralista: probable que foguèt un brave mestièr. Veire passar tot lo vilatge o tot lo barri per crompar lo jornal e escambiar novèlas del canton. Mas ara, entre los jornals en linha e los portaires a domicili (tre l’alba), qun besonh d’anar cò del buralista? La nautor de la pila dels diaris proposats demesís. Abans, quand arribavas dins un acamp e que disíás: “Òu, lo monde, uèi i a un article dins lo jornal sus… que vos disi pas!”, tot lo monde corrissiá crompar lo jornal. Ara, se fas aquò, lo monde te gaitan de coa d’uèlh e te venon: ”Cossi? Legisses encara lo jornal!” e probable que l’informacion s’espandiguèt sul net fa ja un brave moment… Vas passar per un brave retrograde! Vai-te’n parlar del plaser de legir e de desplegar las grandas fuèlhas del jornal… Dins Aude, foguèrem de temps privilegiats amb tres quotidians: La Dépêche (puslèu d’esquèrra), Midi-Libre (puslèu de dreita) e L’Indépendant, mas ara es la meteissa botiga amb meteisses articles e solament quauquas diferéncias de mesa en pagina!

Lo buralista es lo mercand de tabat, susvelhat de prèp per las Doganas. L’Estat jòga doble jòc e vòl a l’encòp tocar la moneda de las talhas e empachar lo monde de tubar per rason de santat. Resulta: lo prètz del tabat e de las cigarretas monta, monta e un circuit parallèle s’es mes en plaça qu’empacha los buralistas de se ganhar lo crostet. Per arrengar las causas, en temps de carnaval, lo rei balha lo marrit/bon exemple e lo vaquí que te fuma la pipa sens tabat! Per compensar, foguèron autorizats de vendre de qué vapotar: mas aquò ven tanben proïbit. E vos parli pas de la venda liura de canabís medicinal jos fòrma de CBD!

Los buralistas fan tanben casinò e pòdes jogar a totas las lotariás pana-sòuses que vòls. Mas es plan luènh lo temps ont causissiás menimosament ton tiquet de la Loteriá Nacionala (un desen, solament). Ara, gaireben tot se fa en mòda laucet o, per compressar lo temps, te sufís de gratussar lo jòc per saupre sulpic s’as ganhat quicòm (al mens, la mesa!).

De paquets, de paquets…

Per ganhar quatre sòus, los buralistas se faguèron punt-relai per la distribucion dels paquets (vist qu’aquel trabalh la Pòsta lo fa de mens en mens). Entre totas las clica-e-coleta e las comandas via Internet, de montanhas de paquets arriban atal cò dels burèus de tabat. E de paquets, n’i a de totas las talhas e de maitas fòrmas que l’un comanda un sagèl, l’autre un CD (e òc, i a de monde retrogrades que son pas passats a l’estrimingue), l’autra un brocat e lo quatren un aspirator o una tondeira de pelena. Al temps de Nadal, se podiá pas dintrar dins la botiga de la buralista del canton de la carrièra qu’èra vengut un entrepaus inextricable de paquets dins de sacas grandas, amb de còdis-barras de pertot e que, de segur, çò que cèrcas es totjorn lo mai malaisit de trapar, es cunhat dins la darrièra saca o s’es perdut en camin! Alara, aquí as dreit a las recriminacions de la practica per çò que un angle de carton es desformat o que lo paquet es arribat en retard per l’anniversari de la pichona. Aquò pòrta suls nèrvis del/de la buralista qu’en mai de sas oras se deu marcar a una activitat de iogà per demorar zen e quièt.

Cambiament de cartochas

Fàcia a la baissa de la chifra d’afars dels buralistas, venon d’aver una idèia novèla: los buralistas van venir armurièrs e passar de la venda de cartochas de cigarretas a la fornidura de cartochas pels caçaires! E aquí problèma novèl en perspectiva: se lo caçaire es un malaisit de primièra (e, aparentament, n’i a quauques-uns a legir cada sason las cronicas dels faits divèrses), qual rendrà responsable de la lèbre mancada e del perdigal envolat? Probable que serà lo/la buralista que li a pas vendudas las bonas cartochas.

Non, francament, vòli pas èsser buralista…

Deburalizat Roch