L’actualitat nos en apren de bèlas cada jorn (e, de còps, la nuèit):

• 1000 Bòrnas: Lo president de França vòl pas pus jogar a las mila bòrnas. Alara, a decidit de metre en plaça un governament novèl sus critèris atal-atal.

• Unifòrme: Se lo primièr ministre transpòsa sa decision de portar unifòrme pels escolans a tota la populacion va èsser encara un fracàs bèl per l’expression de la diversitat.

• Aisit de ganhar: La primièra ministra de Bengla-Desh rempòrta aisidament las eleccions legislativas. Vertat qu’amb los candidats d’oposicion empresonats, aquò’s mai simple.

• Pinochet present: Una primièra novèla constitucion chilena foguèt refusada per referendum: tròp d’esquèrra e tròp dobèrta. La segonda version re-escrita per la dreita: refusada per referendum. Lor i demòra de contunhar d’utilizar la Constitucion de Pinochet!

• Paure Lula: Per faire passar una lei en favor de l’agricultura biologica, accèpta que l’utilizacion dels pesticidis contunhe. Sèm pas arribats ……

• Danemarc: La reina del país ven d’abdicar per trasmetre lo reialme a son filh, mas i a coma quicòm de poirit: un governament “d’esquèrra” mena una politica cap als migrants del tipe “dreita dura”!

• Pòrtas dobèrtas: La societat Boeing a un biais particular d’organizar operacions Pòrtas dobèrtas. Aquò se passèt sus un vòl regular. Sabi pas se botèron los tecnicians a la pòrta.

• Transpòrts: Lo ministre dels transpòrts anèt a Berlin per l’estrena de la linha de nuèit de trens entre Berlin e París. De segur, anèt a Berlin… en avion!

• Per la pòrta o per la finèstra: Un bruch de caçairòlas se fa ausir quand l’ancian president dels XV passaapr’aquí. Lo vaquí ara responsable esportiu a Montpelhièr cò de son amic de las barrièras. N’i a que la vergonha capitarà pas d’escanar!

• Logic: Convocat al tribunal per aver menat una veitura alara que ten pas de permís, se rend a la convocacion al volant d’una veitura e explica qu’èra lo sol mejan per el d’èsser present a l’ora al jutjament!

• Vòts: Pels vòts, la comuna de Carcassona presenta plancardas bèlas per dire que novèls projèctes florisson. Aquò significa probable que los ancians son fanats e capitaràn pas de venir realitats?

• Pichoneta: Del costat de Banyuls de la Marenda, s’es descobèrta una cambaròta tota pichoneta qu’èra encara desconeguda.

• Sens nèu: Alara que la nèu tomba de mens en mens suls Aups, vaquí que França se regaudís de la mai que probable organizacion dels Jòcs Olimpics d’ivèrn dins la contrada en 2030. Comptan probable de pagar las estructuras novèlas amb los sòuses del deficit de l’organizacion dels Jòcs de París! Pensatz qu’auràn pro de moneda per trapar quatre borrilhs?

• Fondamental: Se lo Depardieu agís al nom de Dieu, nos devèm pausar questions sus la pertinéncia de las religions…

• Encara mai polida la vida: Lo fulheton bèl de França-3 (18 ans de difusion) es de retorn… sus TF1. Polit exemple de collaboracion entre lo public e lo privat. Tendràn 18 ans de mai? Ara, nos podèm demandar s’es l’entrepresa Bouygues que bastiguèt lo barri del Mistral primièra version que, fin finala, s’esfondrèt! Los scenaristas an plan d’idèias per faire juntar las 2 istòrias! Autant qu’un cronicaire per escriure un papièr de chicas e de micas…!!!

Autrament Roch