Opinion
Mèfi a la beluga!
Tèxte legit
Diga! Fa quauques jorns que lo sang me brutla e que la barba me fuma, en fach dempuòi lo desbarcament marselhés dau flambèu de la vergonha. D’efièch, que dire d’un mond que daissa morir en nauta mar enfantons e sas maires sus de nègafòls e qu’afreta un velièr prestigiós per anar quèrre en Grècia una flama alucada amb de miralhets? Dins un temps, los grècs portèron la vinha a Marselha mas uòi lo vin s’es gastat en còca-còla, esponsòr oficial… e lo vulgus coma un còp èra bada e pica de las mans dins lo temps que los departaments visitats racan 180 000€…
Val mai ne rire. Pana d’alucatge a Olimpia que fasiá nívol, calguèt sortir lo batifuòc; una còla de 11 personas -los gardians de la conariá- que nuòches e jorns susvelhan lo brandon per cambiar la botelha d’un gas ecolo?!; doas flamas flame nòvas -las dobladuras de l’oficiala- que fan lo viatge en avion en cas de fracatge dau batèu; lo pairòl traucat que se vòl pas alucar, òsca Manòsca! E setmana venenta, avisa! se’n tornaràn los francimands flambèu en man mitan los castèls diches catars o a Lorda. Coma se mancavan de candelons a Massa-Vièlha…
Vòls que te diga? Diluns a Seta la flamba èra sus la barca blava dins lo temps que los de la roja, que pasmens ne fan totjorn quauqu’una que creman au lum, fasián lo morre de pòrc e … Juvinhac, lo jorn dau cors d’occitan, macarèl! Aquí lo problèma màger. Lo Papet, sabètz, aquel que ten la lenga vertadièira, poguèt pas venir au cors cunhat al sieu per tota la gendarmalha de la vila. Coma es un ancian dau rugbi, li conselhère de tornar cargar lo malhòt, las cauças de las margas cortas e de venir en corriguent amb lo candelabre jos los aplaudiments de la fola. O alara, emai aguèsse plogut sur la mercandisa, nus e crus coma los efèbes d’un còp èra. L’an pas volgut. Diguèron qu’amb tot çò que s’empassèt coma pastagasses, vins e finas dau Lengadòc i aviá la risca que s’abrandèsse coma l’esca.
Mas, macarèl, qu’òm en finisca! N’i aurà pas un dins lo país per sonar los canadèrs?
Enfin, es çò que ne dise ieu…
La guinhada de l’IEO34. E, rau!
La guinhada de l’IEO34. E, rau!
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
sei de bana emb lo Domenge ... n'ai mon sadol dau juòcs olimpics e de la corsa a la medalha ... Ukrainia, Palestina , Caledonia , Migrators e.ch.a. , quo es pas ben greu si podem aver una medalha e beure un coca cola ... lo monde a ganhat la medalha de la connaria ...
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari