Bandièra01 capçalera  1180x150: Botiga

Opinion

La flama olimpica

| Paris 2024

La dimenjada passada ganhèri Cevenas per anar veire la decana del vilatge ont espeliguèri a la vida. Beneseta a l’uèlh totjorn aluserpit. Es atalentada a la vida. Me reconeguèt sul pic e foguèt urosa de me veire. Aguèri pas lo temps de la saludar que me diguèt:

“— Coneisses Tòni Estanquet, a París es Estanguet, aicí es Estanquet. Es lo President del Cojò, Comitat d’Organizacion dels Jòcs Olimpics. E ben, figura-te que la setmana passada lo Tòni Estanquèt me sonèt.

— Bonjour Beneseta, quelle chance de vous avoir au téléphone. Etant donné que vous êtes une coureuse de haut niveau, le COJO a pensé à vous pour allumer la flamme lors de l’ouverture des Jeux Olympiques de Paris 2024.

Soi onorada. Me fa plaser qu’aguèssetz pensat a una joveneta esportiva coma ieu per alucar la flama.

— Vous savez que c’est le 26 juillet.

O sabi. O sabi. Es mon anniversari 84 ans! E puèi la flama, l’ai totjorn amb ieu, a l’ostal, me caufi amb lo fuòc!

— Elle arrivera d’Olympie.

Pensatz que passarà per Escòta se Plòu en Cevenas aquí ont demòri? Ieu, l’anarai pas cercar a Olímpia. E puèi, que soi piòta, se la flama del fuòc conven pas, aurai totjorn aquela! (sortís son batifuòc e l’aluca.) La flama del batifuòc!

— La flamme Olympique, Beneseta!

Arrestatz de me contar de cracas! Una flama n’en val una autra! E suspausi qu’avètz comandat lo solelh per aquel jorn?

— Le soleil nous a fourni la flamme. Il sera présent ce jour-là!

Se bofa un ventaràs, me vesètz ieu, amb ma pichòta flama? Se plòu, se tomba de rabanèlas, me vesètz ieu, amb ma pichòta flama?

— Nous maîtrisons parfaitement l’évènement et la météo également.

Per la tenguda, volètz que vengue amb lo shòrt e la camiseta?

— Pour la tenue sportive, on vous fournira un bonnet phrygien olympique. Une phryge.

Aimi mai gardar la poncha per me parar del solelh. Vendrai vestida coma soi!

— Et pour allumer la flamme le 26 juillet vous serez aidée, aidée par ... On ne sait pas encore!

Mas ieu ai pas besonh de degús! Saique benlèu! Me petaçarai tota so-le-ta!”

N’èra fièra Beneseta de son escambi amb lo Tòni Estanguet. Acabèri de dintrar. Me faguèt assetar al canton de la chiminèia. E perseguiguèrem la convèrsa al entorn d’un veironet de riquiquí!

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article