Bandièra01 capçalera  1180x150: Novestivada

Opinion

Sulfatarem!

Sulfatarem!
Sulfatarem!
Domenge Caucat

Domenge Caucat

Aliàs lo Montamametas de son ancian mestièr e ara Domenge d'Erau qu'emplegat per l'IEO Erau, E,... RAU!! coma animator, coordinator e professor d'occitan dins de talhièrs setmanièrs

Mai d’informacions

Tèxte legit

Diga! “Quand lo temps es a l’auratge, coma una banda de salvatges, tot aquò va sulfatar…” E la sansonha conoguda de tornar mai dolentosa que jamai d’aquesta passa: es lo balèti dels tractors de poncha de clar a nuòch facha. Lo pòble de las vinhas pintra la pampa de blau e dins d’unes tenements lo mildió es a se ganhar la partida… E la pression es d’ont mai fòrta que los amics vinhairons, ara en cultura organica per una bona part, son tornats a la sulfata de coire dels ancians. Abandonadas las poisons sistemicas que tuguèron tant dels nòstres, enfarinats que siaguèron per los «conselhièrs agricòlas”. Lor calguèsse faire un monument dins cada vilatge de Lengadòc, a aqueles que se faguèron poirir la sang sens o saupre, la lista seriá plan mai longa que per los paures nòstres peluts de 1914-18. Es per dire.

Vòls que te diga? E ara, los especialistas te conselhan lo parapluòja per vinha! Una entrepresa prepausa una mena de tibanèl, lo Viti-tunèu que dison, que se desplega e se plega automaticament en fonccion d’una meteo donada per los satellites. Basat sus lo principi, “ges de pluòja, ges de mildió” lo daquòs apara lo folhum de l’aubre de la camba tòrta dau contacte dirècte amb l’aiga que contunha pasmens d’asaigar lo pè. En mai, a los creire, t’apara lo vinhòble dau gèl e de la granissada e d’un fum de malautiás. Sabèm pas per lo Marinàs e lo temps mostós, aquò o dison pas. Mas pompon sus Garona!, per vendémias serai a l’ombra e me demande quand me van metre la climatizacion dejós lo parasòl.

Bon per l’impacte sus lo païsatge es question de gost.

E a 60 èuros lo mètre, -a la gròssa entre 240 000 èuros e 360 000 èuros a l’ectara per un pichon  vintenat d’an- plòurà totjorn sus los banhats qu’an pas finit de manivelar. Crese que tant val morir dau mal que dau remèdi.

Enfin, es çò que ne dise ieu …

 

 

 

La guinhada de l’IEO34. E, rau!

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article