Bandièra01 capçalera  1180x150: Novestivada

Opinion

Diferéncia entre los mòdes d’escrutin

Diferéncia entre los mòdes d’escrutin
Diferéncia entre los mòdes d’escrutin
Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions

Benlèu que, coma fòrça monde, atz hèit un brave sospit de solaç a l’anóncia de las resultas de las eleccions legislativas. Non, i aurà pas nat govèrn de dreta extrèma, … au mens ongan.

Mes çò de fòrça interessant es lo cambiament d’ambient entre lo ser de las eleccions europèas e lo de dimenge passat. Pas ren de véser.

Lo ser deu 9 de junh èi dit a la hemna (Un drin coma Georges Marchais o Columbo): "Asser son contents mes veiràn ben çò qu’aquò va balhar dambe un escrutin majoritari a dus torns." E per un còp, m’èri pas enganat.

Aqueste mòde d’escrutin es hèit teoricament per exprimir una causida au purmèr torn e eliminar au dusau. Cau pas estar nèci, estoc sustot creat per qu’i aja pas tròp de cambiament politic e assegurar aisidament una majoritat. Es una de las numerosas variantas d’escrutins qu’estón imaginats, coma per exemple aquera que consistís a classificar los candidats per òrdi e de comptar los punts. Estoc pas jamès utilizat.

E doncas, a maugrat de çò que podèvam pensar, lo RN a conservat son aspècte d’espante. Pensavi que, en preséncia d’un candidat d’aqueste partit, n’i a que, quitament s’an pas ni camba ni braç, van baishar de la luna estant en serpejar dambe lo butletin entre las dents per anar votar contra la formacion deu papà Joan-Maria. Ne soi l’un d’eths.

I avoc tanben un ehèit enganaire a las europèas. Lo RN a recebut un 30% de las votzes, mes dambe la mitat deu monde inscrit qu’a pas votat. Aquò que’ns hè pas que 15%, çò que vòu díser que, de dètz personas, n’i a pas qu’una e mieja qu’es anada botar un butletin a favor de l’ancian FN dens l’urna. Es pauc, fin finala.

La resulta? Lo RN s’es vist tròp polit e s’es parlat fòrça deu Jordan Bardella coma purmèr ministre. An pas calculat dambe la diferéncia d’escrutins que, benlèu es just, benlèu pas, mes hasèva lor victòria fin finala fòrça improbabla.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lachaud
1.

L'òme de la situacion demora Macron. Es ilh e ilh sol qu'a ganhat. Dempuei qu' a estat eligit, a montrar sa capacitat a dominar lo parlement e l'opinion publica. Las eleccions son passadas mas l'an tròba chas los deputats totjorn los mesmes e emben la mesma mentalitat. Si degun o ren l'arresta , deman sera lo president de la comission europeenna.
Es curios quand mesme que l'òm parla pus de fraudas electoralas. Pertant se dich de dròles de causas que se passan quand lo decompte arrieba au niveu dau ministere de l'interieur. Una machina electronica permetria de modifiar los resultats. Quò estat denonçat tan ben aus Estats-Unis.
De mai tot s'es passat dins los medias. Tots los medias encensavan lo front nacional apres lo premier torn e a la fin tots credavan que falia empeschar un fasciste d'arribar au poder.
I a de que se pausar de las questions mas degun s'en pausa coma si tots los deputats de dreicha o d'esquerra memse lo front nacional eran d'accòrd per oblidar aquel problem.
Lo fasciste es Macron que comanda los partits politics e los medias.
Anem, drubam l'uehl e lo bon.

  • 1
  • 2

Escriu un comentari sus aqueste article