Bandièra01 1180x150: Comuna de Tolosa

editorial

Lo trabalh de recuperacion de las encontradas d’Occitània contunha

En junh passat, se presentèt la primièra version del trabalh de recuperacion de las encontradas d’Occitània sus Jornalet. Al sondatge qu’acompanhava l’editorial, que demandava als legeires se cresián que caliá recuperar la division tradicionala de las encontradas d’Occitània, lo 79% votèron positivament. Aquò nos encoratgèt a contunhar de trabalhar per melhorar lo projècte.
 
Dempuèi aquel moment, avèm parlat amb de gents de diferents territòris que nos an indicat d’errors dins lo traçat de cèrtas delimitacions. Las modificacions fachas dempuèi la version precedenta son nombrosas e de mal enumerar. D’en primièr, las frontièras de l’espaci lingüistic son estadas corregidas. D’un autre costat, avèm adaptat las regions a de critèris mai istorics que non pas lingüistics. Las sosregions inicialas foguèron eliminadas, pr’amor que cobrissián pas tot lo territòri ni revertavan pas cap de division coerenta; avèm reformulat lo concèpte de sosregion per ne far quicòm de mai practic, qu’aja mai de sens. Fin finala, avèm fach fòrça remodelacions dels limits e dels noms de las encontradas; ne presentam una tièra aquí, organizada per regions.
 
Calculam que, per ara, aqueste projècte ja nos deu aver demandat aperaquí 600 oras de trabalh, amb de jornadas de 18 oras de contunh, a manjar sus la taula de l’ordenador. A mai, demòra encara plan de trabalh per acabar de far la lista de comunas del país entièr amb lor adscripcion a una encontrada, una sosregion e una region, a mai de las divisions administrativas oficialas actualas – per ara, dispausam d’aquela informacion per la mitat de las comunas.
 
Es per aquò que volèm insistir sul fach que nos ajudariá fòrça de recebre de criticas constructivas per completar lo projècte: o poirem pas tot far solets, es sonque amb l’ajuda de totes que lo projècte poirà correspondre a la volontat d’una majoritat.
 
A mai, aquel trabalh se fa volontàriament, sens cap mena de finançament. Ça que la, Jornalet se tròba encara e totjorn dins una situacion financièra dificila. Se volètz contribuir a permetre a aqueste jornal de contunhar d’editar de nòvas de qualitat e de montar de projèctes pel país, vos remembram que vos podètz engatjar amb l’associacion Amics de Jornalet o amb l’Associacion entara Difusion d’Occitània en Catalonha (ADÒC) aquí: https://www.jornalet.com/socis.

Encontradas d'Occitània


Regions d'Occitània


Regions e sosregions d'Occitània


Comunas d'Occitània


Las mapas actualas se pòdon telecargar en format ZIP aquí. Utilizatz-las per tot çò que voldretz; aital, ajudaretz a las far conéisser.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

petiii_tao pamier
50.

tom alo ?

  • 0
  • 0
Briantin de Montrei Fortuna
49.

Lo Pin dins Lomanha? Pas jamai; fai partida del Brulhés!

  • 3
  • 0
Jean-Jacques Sent Sardòs
48.

#47 Per dire que la comuna d'Escorce, dins las Landas, fa pas partida del País de Bòrn.

  • 1
  • 0
Daniel Picó Barcelona
47.

Recent subscrit, ja gaudint de la troballa del vostre canal del Jornalet.

  • 3
  • 0
Jiròni B. Sent Liunard
46.

Adiu v'autres,

Per l' Encontradas d'Occitània, perque crear (o tornar crear) deus territòris tan diferents per lur talha, coma entre lu País de la Vinhana e lu País d'Anglin (sei lemosin...) o Lana Gran e Senhans, o lu Lauragués e Cordés ? Un territòri coma lu País de la Vinhana a tròp de país e sa vilas dedins Limòtges, per la mai bela, Sent Iriès, Sent Junian, Rechoard, Embasac e Belac, me sembla... Estranh coma chausida...

Bona jornada a tots !

  • 9
  • 0

Escriu un comentari sus aqueste article