Bandièra01 capçalera  1180x150: Novestivada

editorial

Lo gas occitan e lo modèl economic

Lo conflicte a l'entorn del gas de sistre, al delà dels damatges irreparables que ne provocariá l'extraccion dins los parçans mai polits del país nòstre, a tornat metre sul tapís l'inexisténcia d’un modèl economic e d'un desvolopament durable per Occitània. En règla generala, Occitània es venguda l’endrech ont França obten tot çò que li manca o qu’a de besonh. I a plen de centralas nuclearas, de zònas militaras o de camps de tir, de grands airals despoblats aciutament reconvertits en parcs naturals pel léser dels nordistas e en grandas zònas residencialas pels retirats franceses. Tot lo sud de l'exagòn es pensat en foncion del nòrd.
 
Lo país nòstre es pas que l'airal de servicis de França, l'endrech ont i amassa fòrça causas que li geinan. I a pas qu’a prene la veitura e far un torn pels vilatges occitans per se mainar de la manca de vitalitat, l'abséncia de teissut industrial e lo desèrt comercial. Occitània se brèça tot doçament dins un sòm prigond, anestesiada per la cultura de la subvencion e lo poison de l’emigracion.
 
Ça que la, seriá pas just dire que lo modèl economic que França dessenha e aplica per Occitània es colonial. I a d'investiments, coma l'industria aeronautica a Tolosa, que demòstran un cèrt interès a desvolopar lo país sus una basa solida. Mas aquelas industrias e investiments son l’excepcion. Cal, doncas, far un cambiament de direccion e una politica economica orientada a balhar al país las estructuras e los investiments en infrastructuras que pòscan garantir un avenidor economic pel país e pels sieus joves.
 
 
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Patrick Nouguier
3.

Per de que seriá pas just de dire que lo modèl economic es colonial?
En argèria tamben França a fòrça investit (rotas, camin de ferre etc).
La colonisacion del sud pel nòrd la demostratz dins vòstre article: "tot lo sud de l'exagòn es pensat en foncion del nòrd"
Vertat que sèm mai acostumat d'entendre colonial en rapòrt amb las ancianas colonias
d'Africa o d'Orient.
Vertat tamben que los ciutadans occitans an los metèis dreches que los autres çò qu'èra pas lo cas
en Argèria.
Vertat tamben que la presidenciala que ven cambiarà pas res sus aqueste sicut, contunharem d'èsser pensat en foncion del nòrd.

  • 0
  • 0
Laurenç Gavotina
2.

Un dals problèmas qu'existe dins d'activitats delocalizaas de París dins una region occitana es que arriba que sigue una reproduccion dal micro-còsme parisenc sensa coneccion a la region. Lo cas de Sòfia Antipòlis (ò al nivèl cultural lo festenal d'Avinhon), ben que s'emplegue de personal de la region coma de monde de l'internacional, va ren dins lo sens de la region. Es just una question de localizacion en Occitània, mas concretament, aquelas entrepresas fan gaire de causas per lo desvolopament de la lenga, de la cultura e mai generalement de la reflexion per lo desvolopament per viure al país ont son.

  • 8
  • 0
Matieu Castel Amians
1.

E podem parlar tanben de l'organizacion dei transports, pensatz despuei Paris que fan qu'en cas d'aigada grossassa de Garona, lo camin lo mai cortet per anar de Bordèu a Marselha es via Paris !

  • 13
  • 0

Escriu un comentari sus aqueste article