Bandièra01 1180x150: País Invisible

editorial

La Fèsta de la Musica amòrta los fuòcs de Sant Joan?

Per los qu’o sabián pas, en 1976 lo musician nòrd-american Joel Cohen, que trabalhava alavetz a Radio France, prepausèt que lo 21 de junh foguèsse lo jorn de la musica. L’idèa capitava pauc a cha pauc fins que, après las eleccions de 1981, lo ministre de la Cultura Jack Lang l’incorporèt dins lo sieu plan de trabalh ministerial. Dos ans puèi, lo 21 de junh de 1983, se debanèt la primièra edicion de çò que coneissèm coma Fèsta de la Musica. Lo rèsta d’aquela istòria lo coneissètz plan e tre aquel moment la musica florís pertot dins lo país dins una fèsta qu’a trobat una responsa plan positiva de la part del public.
 
Jornalet sosten, solide, la Fèsta de la Musica e totas las autras manifestacions culturalas, quinas que sián e d’ont vengan. O avèm dich ja d’autres còps: aqueste jornal es en favor de la cultura occitana mas es pas contra cap d’autra cultura. Aquò dich, per calmar los esperits susceptibles, òc que volèm avertir qu’aquela Fèsta de la Musica a esfumat, dempuèi un cèrt temps, la fèsta de Sant Joan, una de las fèstas mai enrasigadas en Occitània e, a prepaus, una data que se celèbra dins tot lo territòri occitan. Sant Joan poiriá èsser, de fach, una de las fèstas d’unitat nacionala occitana de referéncia e, per aquò, es bon que la revendiquem amb fermetat.
 
Los fuòcs de Sant Joan e la fèsta populara se pòdon pas amortar amb la boca empastada de la Fèsta de la Musica. Las doas fèstas son plan compatiblas e lo fach que sián tan prèpas dins lo calendièr auriá d’èsser un motiu de jòia pel pòble occitan, be nos agrada plan de far la fèsta e la musica. Es per aquò que Jornalet fa una apèl a festejar la Fèsta de la Musica coma cal, mas tanben a desmembrar pas la fèsta de Sant Joan e crida totes los sieus legeires a reviscolar una de las fèstas nacionalas occitanas.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Matieu Castel Amians
1.

Mai la fèsta de la Sant Joan se debana pas puslèu lo 24 de junh ?

  • 0
  • 0

Escriu un comentari sus aqueste article