Bandièra01 1180x150: País Invisible

editorial

Lo Poton de Bordèu

| Pierre-Selim
Lo candidat bordalés a l’eleccion presidenciala francesa, Philippe Poutou, foguèt l’estonament màger del debat de candidats que se tenguèt dimars passat per television. Se poguèt remarcar pels comentaris suls rets socials, e quitament dins qualque sondatge que donava a Poutou una montada considerabla.
 
Dins lo debat, Poutou desmontèt un per un los arguments de totes los autres candidats, e tanben se'n desmarquèt en refusant de sortir sus la fòto amb eles. “Non son pas los mens collègas”, çò afirmèt del temps que se presentèt coma “un petit candidat” mas que pòt “parlar au nom de milions de gents” car son movement fa partida dels que “[pateishen] la crisi, aqueth rotlèu compressor dau capitau”.
 
 
Sosten al desvolopament de las lengas e a l’autodeterminacion dels pòbles
 
Interessat per sas politicas, nòstre collaborador Theò Bajon, li mandèt un messatge sus Twitter en li demandant çò que ne pensava de las lengas e de las minoritats de l’estat francés, e sa responsa foguèt fòrça estrambordanta. Puèi avèm pogut verificar dins son programa sa bona sensibilitat sus aqueste sicut.
 
Totjorn en parlant a la primièra persona del plural, Poutou expliquèt a Bajon que sostenon “l’autodeterminacion daus pòbles dens tot lo Mond, donc suu territòri de l’estat francés tanben!”. Tanben reconeguèt que “la Republica francesa a volut estofar las lengas e las culturas devath un modèl unic tà assetar la dominacion de l’estat” en tot afirmar que “los politicians nacionalistas en França son los purmèirs a denonciar la cultura impausada per lo capitalisme american, mes los darrèirs a escotar las revendicacions en breton o en creòl”.
 
Per quant a las lengas afirmèt que “las lengas regionaus deven estar preservadas mes tanben desvolopadas”.
 
 
Lo sosten de Jornalet
 
La còla de Jornalet avèm mostrat divèrses còps nòstre sosten a la candidatura de Troadec. Avèm tanben mostrat de simpatias devèrs d’autres candidats coma l’occitanofòn Lasalle e l’anticolonialista Temaru. Ara, dins la lista dels candidats a l’eleccion presidenciala, cresèm que Poutou es lo sol que met en question lo jacobinisme (de drecha e d’esquèrra), es lo sol que defend nòstre drech de viure e decidir al país, e de o far en occitan e a l’occitana, e es lo sol que combat lo faissisme, se cal en tot manifestar per carrièras contra lo Front Nacional.
 
 
 

abonar los amics de Jornalet




Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Marijuana Bernis (La Papèssa) Avinhon
9.

#2 ????????????????????????????????????????

  • 0
  • 0
ct
8.

Vesi pas en qué prene pausicion per Poutou pòt ajudar lo trabalh dels occitanistas.

  • 5
  • 1
Gerard Joan Barceló Pèiralata
7.

#6 Lo principi jornalistic d'un editoriau es de prene posicion. Perqué un jornau de lenga occitana o fariá pas?

  • 5
  • 5
Nicolau Rei Bèthvéder Sent Lis
6.

Pensi pas qu'un jornau pan occitan e generalista a de préner pausicion publicament entà un candidat. Es se copar deus Occitans quan mès deu 95% deus Occitans votaràn pas per lo trotskista Poton.
Hèr de jornalisme de qualitat, en promòver la lenga, es pas se hòra-banir atau.

  • 10
  • 6
Martelaire Midgard
5.

Ieu voti pas car soi pas un ciutadan francés, mas cresi que lo Poutou es un bon candidat per vosautres occitans.

  • 8
  • 6

Escriu un comentari sus aqueste article