Nòvas


10-9-2019

Los Gilets Jaunes anóncian una rintrada “negra”

imatge Amb la rintrada, los Gilets Jaunes an tornat prene las carrièras dins lor 43n acte. Aquel movement critic envèrs  lo president francés, Emmanuel Macron, a anonciat sa rintrada en prometent un “setembre negre”.
 
Dissabte passat, maitas vilas de tot l’estat francés tornèron viure las protèstas d’aquel movement social qu’en qualques lòcs s’acabèt amb d’incidents, mai que mai a Montpelhièr, ont cremèron una veitura de la polícia.
 
En Occitània s’acampèron qualques milièrs de personas, environ 5000 a Tolosa, 3000 a Montpelhièr e qualques centenats a Bordèu, Fois, Marselha e Niça, segon d’informacions de Nòs.
 
A Montpelhièr, los rambalhs comencèron près de la gara e sus la Plaça de la Comèdia, ont los policièrs lancèron de gases lacrimogèns als manifestants. La polícia detenguèt sèt personas.
 
 
Contra la reforma de las retiradas
 
Los manifestants denóncian la granda repression policièra que ne son victimas e reclaman tornarmai la demission de Macron. En mai de protestar contra las inegalitats socialas al país e contra la pèrda del poder de crompa, ara los Gilets Jaunes rebutan la reforma de las retiradas que la prepausa l’executiu francés.

 
 
 

 

Veire l'article sul web
© Jornalet       Version web