Nòvas


11-9-2019

Presonièrs politics catalans: los procuraires espanhòls los vòlon embarrar fòra de Catalonha

imatge La rintrada judiciària dins l’estat espanhòl a començat amb un còp dur contra los presonièrs politics catalans. Los procuraires de l’estat an profechat de la primièra sesilha de la sason, en preséncia del rei, per demandar que los presonièrs catalans sián encarcerats dins de presons fòra de Catalonha. Dins un document de 1500 paginas, los procuraires meton en question las autoritats penitenciàrias catalanas.
 
Lo rapòrt ditz: "Las autoritats de la Generalitat de Catalonha, comprés l'actual director general de las Institucions Penitenciàrias, an mostrat publicament lor refús de la preson provisòria decidida envèrs los acusats pels delictes fòrça grèus que se tenguèron pendent lo dich procès, en los considerant coma de presonièrs politics. Aquelas manifestacions pòdon metre en question las condicions de tranquillitat e d’imparcialitat que son necessàrias per donar a las autoritats e als foncionaris de l'Administracion Penitenciària de Catalonha quand deuràn avalorar se los presonièrs son enfin condemnats”.
 
Lo document mençona las manifestacions que se tenon “almens un còp per setmana” davant las presons ont son embarrats aqueles presonièrs, e o considèra coma una “situacion anomala”.
 
D’autre caire, lo rapòrt critica las decisions judiciàrias d’autres païses europèus coma Alemanha, Belgica, Escòcia o Soïssa, qu’an refusat l’extradicion dels exiliats. D’efièch, considèran que los tribunals europèus an romput lo principi de “fisança mutuala”.
 
 
La senténcia abans lo 16 d’octòbre
 
Lo tribunal de la Cort Suprèma, qu’a jutjat los presonièrs politics catalans, calcula qu’aurà alestida sa senténcia abans lo 16 d’octòbre. A aquela data, farà dos ans que los primièrs dos embarrats, Jordi Cuixart e Jordi Sánchez, son en preson preventiva e caldriá organizar una sesilha extraordinària se los jutges volguèsson perlongar lor situacion.
 
 
 


 

Veire l'article sul web
© Jornalet       Version web