Dijòus passat de matin, la polícia espanhòla despleguèt una macrooperacion policièra a Barcelona amb de tòcas confusas. Coma en d'ocasions precedentas, los mèdias de Madrid (dont El Confidencial, El País e El Mundo) parlavan de l'operacion abans que los policièrs arribèsson als luòcs que pus tard escorcolharián. Aqueles jornals raportavan que los policièrs menavan una enquèsta per trobar lo finançament public del referendum sus l'independéncia del 1r d'octòbre passat.
 
Mas dins tot aquel embolh mediatic, los mèdias raportavan un trentenat de d’arrestacions, mai que mai de nauts responsables de la Generalitat. Mas qualques unas foguèron sul pic desmentidas pels quites mençonats.
 
Quaranta minutas après las primièras informacions publicadas dins los mèdias madridencs, la Cort Superiora de Justícia de Catalonha confirmèt que s'agissiá d'una operacion de la polícia espanhòla a la demanda del tribunal numèro 1 de Barcelona, qu'es a menar una enquèsta "dempuèi mai d'un an" per trobar "una trama qu'auriá fraudat almens dos milions d'èuros a travèrs de subvencions irregularas en matèria de cooperacion al desvolopament a partir de la Deputacion (conselh provincial) de Barcelona per mejan d'una tièra d'entitats". Atal, la justícia a pas parlat de cap d'enquèsta restacada amb lo primièr d'octòbre.
 
Dins un segond comunicat, la cort afirma que s'enquèsta sus de subvencions irregularas, que lo dorsièr es, pel moment, secret, e que s'es decretat un vintenat d'escorcolhs d'organismes publics de Catalonha e d'associacions restacadas amb la solidaritat e la cooperacion internacionalas. An detengut una trentena de personas.
 
 
Lo meteis jorn que la justícia condemna lo PP per corrupcion
 
Aquela operacion arriba lo meteis jorn que se publica la senténcia de l'Afar Gürtel, un afar politicofinancièr que seguís una enquèsta menada a partir de febrièr de 2009 pel jutge de l’Audiéncia Nacionala espanhòla, Baltasar Garzón. E mai lo jutge foguèsse destituit e enseguit, l’afar es encara en cors d’instruccion e implica un presumit ret de corrupcion ligat al Partit Popular (PP). Lo verdicte condemna l'èx-clavaire del partit a 33 ans de preson, lo cap de la trama, Francisco Correa, a 51 ans d'encarceracion, e condemna tanben lo Partit Popular per s’èsser enriquit illegalament a una multa de 245 000 èuros.
 
E mai, aquela operacion aguèt luòc après que la justícia alemanda aguèt refusat l'extradicion del 130n president de la Generalitat en exili, Carles Puigdemont,  e un jorn après l’arrestacion de l'èx-president valencian e èx-ministre del govèrn espanhòl de José María Aznar per corrupcion; 13 membres d'aquel govèrn espanhòl son doncas jutjats per corrupcion.