Bandièra01 1180x150: Comuna de Tolosa

Actualitats

L’ensenhament de l’occitan es en perilh al licèu

En l’estat actual de la reforma, l’opcion occitan comptarà per mens de l’1% de la nòta a l’examen. Gric de Prat, l’ÒPLO e la FÈLCO manifèstan lor chepic

L'exposicion "Lenga de nosta" se tenguèt en decembre passat al licèu Lautreamont de Tarba
L'exposicion "Lenga de nosta" se tenguèt en decembre passat al licèu Lautreamont de Tarba | Tarba en Canta
L’ensenhament de l’occitan es en perilh dins los pauques licèus ont se ten. La companhiá Gric de Prat ven de publicar un comunicat ont mòstra son chepic màger per “la supression de tota bonificacion au bachelierat”, que “se precisa malgrat totas las protestacions”. En l’estat actual de la reforma, l’opcion occitan comptarà per mens de l’1% de la nòta a l’examen, çò rapòrta la companhia bordalesa que denóncia “una reculada de plusors desenas d’annadas ”, del temps que planh que l’ensenhament de la lenga nòstra demòre reservat als solets passionats.
 
L’Ofici Public de la Lenga Occitana (ÒPLO) confirma aquel chepic. Sa presidenta, Charline Claveau-Abbadie, afirma que “la reforma deu licèu nos inquieta per la lenga occitana”. Claveau-Abbadie a manifestat son chepic dins una entrevista al jornal Sud Ouest ont anóncia la creacion d’una antena de l’ofici a Bordèu.
 
De son costat, la Federacion dels Ensenhaires de Lenga e Cultura Occitanas (FÈLCO) avertís dempuèi de temps dels risques de la reforma francesa dels collègis, que representa un pas enrèire quitament a respècte de la lei francesa de l’educacion de 2013 e, un còp de mai, una ataca contra la lenga occitana. Ara, la FÈLCO interpèla los elegits.
 
D’un caire, an publicat un rapòrt sus l’estat de las lengas mal nomenadas regionalas abans e après la reforma. D’autre caire, an mandat una letra al ministèri e als elegits per lor manifestar lor desacòrdi e demandar d’èsser recebuts e escotats.
 
Tanben la secretària nacionala del sindicat francés dels ensenhaments de segon gra (SNES) a escrich al ministre francés de l’educacion.
 
 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" igualada (PP.CC.)
7.

Que passa es que al País d'Oc, no valoren el que tenen, si no ho volen valorar, sempre se'n poden anar, i deixar que els Occitans faixin la seva vida, i fora problema.
Potser es massa complicat per a ells pensar això, però ho podrien considerar, no es mala idea, oi!?
Visca la Terra...Lliure!
L'Ernest, "El Tàrrega".

  • 0
  • 0
francesc palma
6.

Aquest govern de Macarrona son un fachas.

  • 1
  • 1
Reinat TOSCANO LO VAU
5.

Dins mon Liceu, leis escolans qu'an demandat de se marcar per l'atalhier de provençau au moment de son inscripcion (fin de junh, començament de julhet), son pas estats pres en còmpte perqué lo Provisor Adjonch "ignorava la denominacion oficiala e lei podié doncas pas inserir dins lo logiciau"! Après, m'an demandat de fornir ... la lista d'aquéleis escolans! Que naturalament lo podiéu pas faire, vist que non siéu responsable de la gestion deis inscripcions au Liceu ni de la gestion dei dossiers deis escolans...
Quand ai explicat que, au moment de l'inscripcion, i avié pasmens la possibilitat d'escriure lei noms sus un fuèlh, m'es estat respondut : "siam ai temps dau numeric, es impensable de mesclar numeric e fuèlh de papier!"
Dins lo meme temps, silenci complet quora ai demandat de faire passar un messatge d'informacion sus la ret de television dau Liceu.
E quand ai demandat coma me sarién pagadas leis oras, m'an respondut: "Nos porriatz fornir... la lista deis escolans qu'an demandat son inscripcion?" (demanda signada per ... lo secretari en carga dei dossiers deis escolans, es à dire lo mai ben plaçat per aver l'informacion).
Doncas, ai tot arrestat. Mai, un mes après, totjorn pas de reaccion de la Direccion...

  • 7
  • 0
Ernèst Guevara Jr.
4.

#2 Cercan pas tot çò que pòdon per tuar l'occitan, mas tot çò que pòdon per gastar mens de moneda publica, amb la volontat d'aleugierir sempre mai e del mai que se pòsca la pression fiscala subre les entrepresas e subre los mai rics. Son un governament de dreita plan dura. Lor mancan sonque lo racisme obèrt e los delictes d'opinion per virar clarament faiscista. Es atal, d'un ase jamai non se farà pas un caval.

  • 7
  • 2
La Trèva de Plumalhon
3.

Me damne, sem jà lo primièr d'abril o aquò's un mescladis pudent de necitge, d'inconsciènça e d'ipocrisia lordassa ! Avètz plan legit : la Claveau-Abbadie nos afirma que “s'inquieta per la lenga occitana” !!! E de qui coneis aquela a-n-aquesta lenga qu'es pas la seuna e qu'a tot fach per escanar amb sa còla de l'Office Public de Liquidation de l'Occitan ? Puta, es vertadièrament l'espital que se trufa de la caritat !!!!

  • 13
  • 0

Escriu un comentari sus aqueste article