Bandièra01 1180x150: Comuna de Tolosa

Actualitats

Espelisson sus Internet de campanhas per la dignitat de l’occitanitat

En Auvèrnhe una peticion en linha amassa de signaturas per salvar e restaurar l’occitanitat del país nòrd-occitan mentre qu’una autra peticion demanda a Carole Delga que faga quicòm contra “la mòrt programada de la lenga d’òc”

Per visibilizar e salvagardar l’occitan en Auvèrnhe
 
S’es lançada una campanha “per la visibilitat e la salvagarda de la cultura e la lenga occitanas en Auvèrnhe”. La campanha demanda al rectorat de l’Acadèmia de Clarmont-Ferrand, a la comuna de la capitala auvernhata, al conselh departamental del Puei Domat, a France 3 Auvèrnhe e a la region Auvèrnhe-Ròse-Alps que fagan quicòm per visibilizar e salvagardar la lenga e la cultura occitanas.
 
“Demòras en Auvèrnhe, al nòrd d’un territòri cultural vast que s’apèla «Occitània» e, coma de miladas de personas aicí, n’as pas cap de consciéncia”, çò ditz lo tèxt de la campanha, que precisa que los auvernhats e las auvernhatas “sèm gaireben totes aculturats”.
 
Per revirar aquela situacion d’alienacion, revendican l’occitan dins la senhaletica, dins los noms de las vilas e dels vilatges, de las carrièras, dels monuments, dins los mèdias e dins l’educacion. E mai planhon la non-preséncia del drapèl auvernhat al país.
 
Enfin, revendican “la memòria”, “la fiertat” e sustot, que la cultura del país demòre pas solament dins “lo capítol de folclòre dels libres d’istòria” mas que “torne viventa per las generacions que venon”.
 
— Podètz signar a: Visibilité et sauvegarde de la culture et de la langue occitanes en Auvergne.
 
 
A Carole Delga contra la “mòrt programada de la lenga d’òc”
 
Gaireben al meteis moment es lançat una peticion adreiçada a la presidenta de la region qu’a pres lo nom d’Occitània, Carole Delga, contra la “mòrt programada de la lenga d’òc”.
 
Los qu’an entamenada la campanha planhon que la lenga occitana siá pas pus ausida per carrièras e deploran que los enfants comprengan pas pus la lenga de lors grands.
 
Lo tèxt de la campanha detalha e denóncia lo procès lingüicida que l’a patit la lenga nòstra, del temps que planh que l’estat francés “consagre a pena la mitat d’un èuro per abitant e per an a la cultura occitana”. D’efièch, li grèva qu’a pena “l’1% [dels escolans occitans] se tròben en situacion de recebre un ensenhament bilingüe”.  Enfin, demanda a Carole Delga “de far atribuir a la cultura d’òc lo respècte e los mejans autrejats a tota cultura prestigiosa”.
 
— Podètz signar a: Madame la Présidente de la région Occitanie: Non à la mort programmée de la langue d’oc.
 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

E Passa Que T Ai Vist Lo Clapàs (Montpelhièr)
10.

#9 Plan vertat, dempuèi que la region se sona Occitanie es pas mai occitana o occitanitzada qu'abans. Lo maximum de l'occitanituda que sovetavan far los elegits regionals èra, a la rigor, de concedar lo nom d'Occitanie a la region, e aprèp, basta, contentatz-vos d'aquo ! D'aqui a lor demandar de reoccitanitzar las tèrras d'oc, cal pas somiar ! D'aquo ne foguèt e ne serà pas jamai question per aqueles elegits de la republica francimanda de Paris. Alara lor cridar ajuda per sauvar ço que demora d'occitan es de segur se bressar d'illusions.

  • 8
  • 0
Manas Roquetianas
9.

#7 Es tota l'equivoca amb aquel nom de region, vertadièr aganta-colhon semantic. Se sona benlèu "Occitanie" mas a autant a veire amb Occitània e l'occitan que las democracias populàrias d'antan avian a veire amb la democracia o un poder populari . En clar èra d'a fons l'exacte contrari. La region "Occitanie" rima pas amb Occitània e encara mens amb occitan. La Carole Delga n'es la prova vidanta.

  • 7
  • 2
Lissandre Varenne GEVAUDAN
8.

"es lançat una peticion adreiçada a la presidenta de la region qu’a pres lo nom d’Occitània, Carole Delga, contra la “mòrt programada de la lenga d’òc”.
Los qu’an entamenada la campanha planhon que la lenga occitana siá pas pus ausida per carrièras e deploran que los enfants comprengan pas pus la lenga de lors grands."


Que l'Estat siage responsable a 99% de la quasi abséncia de transmission de la lenga e que siage pas vistabla, segur, mès que los occitanistas parents transmeton pas la lenga, s'apren pas qu'a eles. Totjorn i tornem e las causas avançan pas gaire.
Chal èstre clar, mai per grand-res de militants, l'occitan es total pas qu'un léser, pas una identitat complèta que si transmet naturalament en familha sens esperar res de l'escòla...que ne desculpabiliza un escag per pas dire la majoritat.

  • 8
  • 0
La Trèva de La Setmana
7.

Carole Delga, sauvaira de la lenga occitana, badinatz ? E perque pas lo Macron tant qu'i sètz !

  • 7
  • 3
Pas Sup
6.

#5
D'una es pas una ardoèsa..
Dos se farà pas en un virat de man
tres una dralha que cal siègre çò me sembla, amai s'es pas aisit; caldrà convencer, nosaus d'en primier, puèi los autres.

Dins d'abòrd o cal far dintrar dins los caps; e de segur plan alestir çò que volem. apèi nos cal una organizacion, un biais de trabalhar e una transparencia na tot nivèl.

e cap de plaça pels amics e las magolhas, los trecimacís pichons e grands.

Per acabar avem cap de razons de far messorgas.

  • 3
  • 1

Escriu un comentari sus aqueste article