La Generalitat de Catalonha, lo Conselh General d’Aran e l’Universitat de Lhèida an signat un acòrdi per que las espròvas d’accès a l’Universitat se pòscan far en occitan. E mai totes los examens se poguèsson ja far en lenga nòstra puèi que l'occitan es oficial en Catalonha, desenant l’Universitat prepausarà los enonciats de qualques examens d’accès a l’universitat en lenga nòstra e ne garentirà una correccion en condicions volgudas. Inicialament, per las espròvas preüniversitàrias d’ongan, se prepausarà en aranés los enonciats de l’examen d’istòria, matèria obligatòria per totes los escolans. Pus tard s’incorporarà los enonciats dels examens de las autras matèrias.
 
Lo Conselh General d’Aran designarà las personas que menaràn a bon tèrme la traduccion dels enonciats e n’assumirà las despensas de traduccion. Los traductors seguiràn un protocòl de confidencialitat.
 
Quant als còstes d’edicion e d’impression dels enonciats dels examens en occitan, es la Generalitat de Catalonha que los prendrà en carga. De son caire, l’Universitat de Lhèida s’encarga de provesir los mecanismes de besonh per que las correccions dels examens sián fachas en egalitat de condicions amb los que presentaràn lors examens dins las autras lengas oficialas.
 
Lo sindic d’Aran, Carlos Barrera, a soslinhat que l’acòrdi que se ven de signar met lo ponch final a una revendicacion istorica dels araneses. Dins aquel sens cal mençonar l’estudianta aranesa Lourdes Bruna, qu’en 2017 respondèt pel primièr còp a dos examens preüniversitaris en aranés, après o demandar pr’amor de l’oficialitat de l’occitan en Catalonha dempuèi 2006.