Un constat que hè dòu, chic de familhas transmeten la lenga deu país a la generacion que segueish. E los mainats de las Calandretas o de las escòlas bilinguas non parlan pas occitan horà l’escòla. L’arraton deu castèth que neishó d’aquera idèa.
 
L’associacion Escòla Gaston Fèbus que creè un sit en tot suenhar la presentacion, lo grafisme. Qu’ei simple d’emplegar, ludic. Vinhetas qu’anóncian lo subjècte e l’atge deus mainats que pòden legir l’article. Per exemple, entà los de 6-7 ans, los tèxts que son simples, bracs, dab enregistrament àudio. Lo sit que mescla cultura e amusament. Los articles d’istòria que contan las hèitas qui merquèn la vita de Gasconha despuish la Preïstòria. Que pòden descobrir lo cambiament de clima au Neolitic, l’arribada deus ibèrs, la batalha de Tartàs, etc. L’espaci “Natura” que permet de familiarizà’s dab los animaus e las flors deu país. Que pòden apréner 40 000 gruas qu’estón comptadas dens las Lanas en un ivèrn o coma diferenciar las gruas de las aucas a la volada. Ua part importanta qu’ei deishada aus contes tradicionaus e actuaus. Los mainats que pòden enténer o tornar enténer los esplèits deu Tac o de la Goluda, o reconéisher Polifèm dens la legenda deu Becut.
 
Totun, l’Escòla que voló privilegiar un ròtle de passatemps, de divertiment dens aqueth sit. E que tròban cançons —tèxt e àudio— coma La marcha caseriena qui obreish las corsas landesas o Lo nhacar, un semblant trufandèr de haka. Fin finau, que i a jòcs, devinalhas, quizz, Memory… e tanben vidèos d’animacion.
 
Lo sit qu’ei tot recent. Cadun que pòt mandar articles, dessenhs, enregistraments. Mes d’un qu’ac hasó e, adara, que i a un article navèth cada dus jorns. Qu’espèran qu’aquera iniciativa troberà lo son public.
 
De vesitar arraton.fr.
 
 
 
Anne-Pierre Darrées