Bandièra01 1180x150: País Invisible

Actualitats

La Nòva Zelanda prioriza lo benèsser dels ciutadans dins un budget pionièr

Pel primièr còp se ten pas compte dels indicadors economics mas dels besonhs socials

La proposicion de budget que la presentèt la primièra ministra Jacinda Ardern es fondada sul benèsser dels ciutadans, en se passant dels indicadors economics coma la productivitat e la creissença
La proposicion de budget que la presentèt la primièra ministra Jacinda Ardern es fondada sul benèsser dels ciutadans, en se passant dels indicadors economics coma la productivitat e la creissença | Governor-General of New Zealand
Lo govèrn de la Nòva Zelanda farà un budget fondat sul benèsser dels ciutadans, en se passant dels indicadors economics coma la productivitat e la creissença. L’iniciativa, pionèra al Mond, a suscitat un viu debat. Ne parlèt fa qualques setmanas The New York Times.
 
La proposicion de budget que la presentèt la primièra ministra Jacinda Ardern conten cinc prioritats dont melhorar la santat mentala, reduire la pauretat infantila, metre fin a las inegalitats dels indigènas maòris e los de las illas del Pacific, progressar dins lo numeric e caminar devèrs una economia duradissa e de bassas emissions de pollucion. De soslinhar tanben la prevision de mai de 200 milions de dolars per refortir l’atencion portada a las victimas de la violéncia de genre. S’agís de l’investiment pus grand que se siá fach contra un problèma qu’Ardern considèra “inquietant” e “vergonhable”.
 
Lo govèrn neozelandés a anonciat tanben d’autras mesuras coma una promocion de lotjaments per las personas sens domicili fixe, e s’es engatjat a demesir lo nombre de maòris embarrats en preson. De mençonar qu’aquel pòble originari del país es subrerepresentat dins la populacion penitenciària e ne cal soscar las rasons.
 
En mai d’aquò, lo govèrn vòl assegurar la continuitat d’aquelas politicas, en cas qu’a las eleccions de 2020 càmbie lo govèrn.
 
L’article de The New York Times cita las declaracions del professor de l’escòla d’economia de Londres, Richard Layard, qu’assegura que, fins ara, cap de govèrn del Mond aviá pas priorizat las politicas restacadas al benèsser coma o a fach la Nòva Zelanda.
 
 
De criticas
 
L’oposocion de centredrecha a criticat aquel budget. Dison que totes los govèrns an ensajat de melhorar la vida dels ciutadans, mas qu’aqueste còp lo govèrn de Jacinda Ardern a fach una “campanha de marqueting”.
 
“Los neozelandeses beneficiaràn pas d’un govèrn que prenga pas en compte la desacceleracion de l’economia e se centre sus la marca. Dins los ans venents afrontarem de perilhs economics importants mas lo govèrn s’es centrat sus una campanha de marquetling”, çò afirmèt la deputada de l’oposicion Amy Adams.
 
De son latz, lo professor d’economia de l’Universitat Victòria de Wellington e èx-president del Banca Centrala de la Nòva Zelanda, Arthur Grimes, aviá afirmat que lo govèrn aviá perdut l’escasença de metre en òbra de politicas per redusir las inegalitats economicas e socialas amb un impòst suls beneficis del capitala o una reforma sociala. “Caldrà veire cossí serà de diferent lo budget d’ongan. Soi segur que faran quicòm de significatiu en aquel budget, mas poirián far mai”, çò precisèt.


 



abonar los amics de Jornalet
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
3.

Aquesta senhora almanco a bonas intencion d'ajudar a la gent que o necessita. Mas en la fota posa una cara com si premés, pot ser tenga restrenhiment.

  • 0
  • 0
Kiwi
2.

En Novèla Zelanda, i a de polit mond.
Cal remembrar Sir John Hillary, que decidiguèt qu'un sherpa deviá èsser lo primièr a trepejar la cima de l’Everèst. Aquò seriá pas vengut a l’idèa del francés que faguèt, coma disiá, lo « primièr 8000 » (Annapurna), vist que, practicament, se petacèt per far pas tròp de publicitat al savosian que montèt amb el, Louis Lachenal.

  • 2
  • 0
Black Blòc Joe
1.

Per priorizar a de bon lo benèsser dels ciutadans, cal luchar contra las dictaturas del societisme e del capitalisme, fins a se'n desbarrassar definitivament, n'acabar definitivament amb la publicitat e la prensa people que pren sistematicament per referéncia de gents que se son enriquidas dessenadament al necessari detriment dels autres totes. Per priorizar lo benèsser dels ciutadans, cal absoludament que sián los ciutadans que prengan totas las decisions economicas e ecologicas, collectivament e participativament : cal la democracia dirècta.

Cal quitar d'esperar après de femnas o d'òmes providencials (elegits o plaçats al poder per revolucion) que farián caire del cèl provenda… Aquò non pòt pas existir.

  • 10
  • 1

Escriu un comentari sus aqueste article