Bandièra01 1180x150: Comuna de Tolosa

Actualitats

L’Ostal d’Occitània festeja uèi son seisen anniversari

L’anniversari servirà tanben per omenatjar l’actor, comedian e presentaire de television, Maurici Andrieu, mòrt lo 15 de novembre de 2011

L'Ostal d'Occitània a Tolosa
L'Ostal d'Occitània a Tolosa | Comuna de Tolosa

La Comèdia Tolzana, lo grop de bodegas Brancaleone e los dançaires del grop Estèrri acompanharàn la serada.


Uèi, a sièis oras del ser, a l’11 de la carrièra Malcosinat de Tolosa, l’Ostal d’Occitània de Tolosa festeja sos sièis ans d’existéncia. Foguèt lo 16 de decembre de 2006 que lo President de Convergéncia Occitana —l’associacion que gerís lo luòc— poguèt inaugurar l’Ostal, amb lo cònsol de Tolosa, lo President del Conselh General de la Nauta Garona e lo President de la Region de Miègjorn-Pirenèus de l’epòca. Uèi, l’Ostal d’Occitània es lo sèti e lo centre de creacion e d’administracion de qualques 80 associacions recampadas dintre Convergéncia Occitana, la federacion causida per la comuna de Tolosa per portar lo projècte cultural de l’Ostal d’Occitània.
 
L’Ostal es un espaci dedicat a la creacion e al raionament de la cultura e de la lenga occitanas. Aquel luòc de bona convivéncia, d’animacion e de creacion compren un espaci scenic, una estructura d’acuèlh e d’informacion del public, d’espacis de mòstras, una botiga e de salas de rescontres. Una de las caracteristicas de l’Ostal es que s’agís de dos bastiments classats “monuments istorics”, dins lo quartièr Esquiròl del centre de Tolosa: l’Ostal de Boisson (Ostal capitular d’estil Renaissença) e l’Ostal de Cheverrí (son extension al sègle XVIII).
 
Per festejar aquela capitada, l’Ostal dobrís uèi las pòrtas a sièis oras del ser amb la musica dels bodegaires tolosans de Brancaleone. En seguida, se farà un discors d’omenatge al grand comedian, artista e presentaire de television occitan Maurici Andrieu, que moriguèt lo 15 de novembre de l’an passat. Après lo discors, la Comèdia Tolzana jogarà una representacion teatrala tanben d’omenatge a Andrieu e en seguida lo grop Estèrri ofrirà un balèti occitan fins a dètz oras del ser. A uech oras es tanben previst un sopar gascon, amb de fetge gras, de magret e las melhoras mangiscas del costat occidental de Garona.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gargantua Lemosin
4.

E un Ostau d'Occitània dins lo nòrd d'Occitània : Lemòtges, Clarmont d'Alvernhe, Valença, perqué pas ?

  • 1
  • 0
IGlauja Marselha
3.

es un projècte qu'avèm, a l'Ostau dau País Marselhés.
Es una debuta, mai avèm començat d'en parlar ambé leis IEO, AELOC, Partit Occitan, e avèm reçauput lo sosten public de P. Breschet (IEO Federau). Vodriam tanben rescontrar la còla de l'Ostal d'Occitania per parlar de tot aquò... i a vertadierament quauquarèn da far, a Marselha...

  • 3
  • 0
Garri Baldi Nissa
2.

Brau per aquò. Bòn aniversari a tot lo monde de l'Ostal de Tolosa !

Una cauva per veire la disparitat de situacions. A l’ocasion de li eleccions municipali de 2008, siguèt fach de Preposicions per lo desvelopament de la lenga e la cultura d'Òc cf. http://ccocpaisnissart.free.fr/Propositions_Nice_Convergenca.htm

Dins aquela dinamica, s'èra lançat lo projeit de far a Nissa una Maison per li associacions d'Òc (aqueli s'ocupant dau nissart, gavòt, provençau) a vocacion interregionala. Mas pauqui associacion siguèron interessadi per seguir l'òbra. E au final, deguna associacion vouguèt trabalhar per aquò. Aüra, coma avant, cadun trabalha de son costat. Divisir per renhar melhor que...
Cau creire que, per lo pus pròche de nautres, i a que Tolosa a capitar e a mostrar que pòu durar ansinda...

  • 3
  • 0
A. Venturier Alaug
1.

Òsca.

Mi fa pensar que seriá ben de profichar de 2013 Marselha- Provença, capitala europèa de la cultura (cf. http://www.mp2013.fr) per demandar e trabalhar dins lo sens per que l'ague una estructura similària "Ostau d'Occitània de Marselha", acampant leis associaciens per la lenga nòstra amb aquesto pòle interregionau per la cultura.

  • 5
  • 0

Escriu un comentari sus aqueste article