Bandièra01 1180x150: País Invisible

Actualitats

crotz-tolosaCreated with Sketch.GasconhaBearnVath d'Aussau

Leugièr sisme de 4,8 en Bearn

| Frédérique PANASSAC
Un tèrratrem, de magnitud 4,8 segon l’escala de Richter, se sentiguèt la nuèch de diluns en Bearn, sens aver provocat cap de mal segon los pompièrs, que totun parlan d’una gangassada “pro importanta”, ja que lo mond la sentiguèron a 0h30 entre Pau e la Val d’Aussau. Mai d’un centenat de vesins telefonèron als pompièrs.
 
L’observatòri sismologic d’Estrasborg (Alsàcia) a indicat que l’epicentre del sisme èra plaçat entre las vilas de Coarrasa e Nai, e la tèrra pòt aver tremolat fins a cent quilomètres a l’entorn.
 
Una replica del sisme se debanèt a 1h07 amb una magnitud fòrça mai flaca, de 2,7. Los pompièrs an explicat que se i aviá d’autras replicas, la populacion las sentiriá pas.
 
Aquel parçan pirenenc es un endrech ont se debanan de sismes regularament, mas de tèrratrems coma aquel de ièr diluns se debanan un còp cada dos ans, segon d’informacions del burèu sismologic alsacian. Ça que la, lo 13 d’agost de 1967, se i debanèt un dels escasses tèrratrems mortals, a Areta, que provoquèt un mòrt, qualques ferits e la destruccion d’una granda partida de la vila.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article