Bandièra01 1180x150: Comuna de Tolosa

Actualitats

crotz-tolosaCreated with Sketch.Lengadòc

L’autre país de la trufa

L'ora del mercat de las trufas se sarra
L'ora del mercat de las trufas se sarra | Mirelha Braç
Quand se parla trufa negra, se pensa lèu-fait a Peiregòrd, Carcin o Provença. Mas Lengadòc fa part d’aquel concèrt, e en particulièr lo país audenc amb una trilogia entre Corbièras, Menerbés e Cabardés.
 
Se Talairan (Corbièras) a ja organizat la Fèsta de la Trufa de l’An novèl (lo 12 de genièr) e se Vilanòva de Menerbés prepara sa Nuèit de la Trufa (dissabte 9 de febrièr), lo Cabardès celèbra a l’encòp los vins del terrador e lo preciós campairòl aquesta dimenjada amb la tenguda d’una edicion novèla de las Ampelofoliás.
 
Aqueste dissabte 26 de matin, lo talhièr-cosina especializat trufas aficha ja complèt. Lo vèspre, plaça a las Ampelofoliás literàrias al Vilatge del Libre de Montoliu amb unas lecturas sul vin e la presentacion dels vins catalans de la DO Alella.
 
Per la serada, los organizaires, estacats al país, convidan lo monde a assistir al recital de Mans de Breish al teatre Municipal de Carcassona dins l’encastre de la Setmana Occitana.
 
Mas lo rendètz-vos bèl de la manifestacion se ten aqueste dimenge 27, long de la jornada, a Mossolens: mercat del terrador, concors culinari, passejadas viticolo-trufièras, demostracions de cavatge, conferéncias sus la trufa negra, taulièrs de l’IEO e de Macarèl, presentacion dels trofèus de l’ASCarcassona XIIII, l’aigardentaire, las Joguinas d’Òc, un fabricant d’acordeons, animacions musicalas (La Fanfareta farà restontir los aires del país), tastas de vin. Se pòt manjar d’entrepans trufats (magrets, fetge gras, pòrc rostit, pascada,..), una patana al burre trufat, una sopa trufada, …
 
E, sulcòp de doas e mièja del vèspre, lo grand moment del mercat de las trufas. Se vendon al detalh e son estadas examinadas abans la mesa en venda: vist lo prètz, val mai que la qualitat siague garantida! Pas de crenta: lo Felip a lo nas e l’uèlh! Lo cors es per l’ora de l’òrdre de 1000 èuros lo kg. Mas los cosinièrs e cosinièras sabon faire un fum de causas e de miracles gastronomics amb 30 o 40 g de trufa!
 
 
 
 
Alan Roch

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

romegaire bof
4.

òc-ben, sabi, sabi... d'alhors l'escaduda massiva de l'accion de l'IEO amuisha plan l'eficacitat d'aquera mena de festenaus !

disi pas que ne'n fau pas, d'aquestas nuits de la trufa (jo medish sui hòrt implicat dens la confreria deu Borit de nadau), solide que son necitas ! disi juste qu'a fòrça de quichar sus aquò meilèu que sus auta causa (sabi pas jo, per exèmple luta per lo doble aficatge, per la tele publica, per desenvelopar la premsa locala, per bastir transpòrts publics vertadeirament publics...), acabam per balhar un imatge de Groland. e que lo monde se'n satisfèci, d'aqueth imatge, aquò me fatiga drin...

  • 5
  • 0
Ampelofoliás de Cabardés
3.

Lo sosten a l'economia dels territòris e a la cultura es tanben una accion poltica.

  • 2
  • 0
romegaire bof
2.

politica a catalonha, terrador, bostifalha e taulièrs de l'IEO a nòste...

  • 9
  • 1
Pirolet
1.

Te trufes pas de ieu! I a trufa e trufa!

  • 1
  • 0

Escriu un comentari sus aqueste article