Bandièra01 1180x150: País Invisible

Actualitats

Irlanda del Nòrd: la justícia declara que las victimas del Massacre de Ballymurphy èran “entièrament innocentas”

En agost de 1971 l’armada britanica fusilhèt nòu personas, mas la jutgessa a pas pogut establir qual tirèt sus la desena victima

Tèxte legit

La Justícia d’Irlanda del Nòrd a conclús que los dètz civils mòrts entre lo 9 e l’11 d’agost de 1971 dins lo quartièr de Bhaile Uí Mhurchú (en anglés Ballymurphy) èran “entièrament innocents”.
 
La jutgessa Siobhan Keegan presentèt dimars las conclusions de l’enquista que comencèt en novembre de 2018: se determina que las victimas èran “entièrament innocents d’aver comés un delicte lo jorn en question” e que los soldats tirèron sens cap de sòrta de justificacion.
 
Lo massacre comencèt lo 9 d’agost de 1971, quand l’armada intrèt dins las zònas republicanas tanlèu après l’instauracion d’una lei que permetiá d’arrestar e internar tota persona sospechada d’èsser de l’IRA. Entre lo 9 e l’11 d’agost tuèron 10 personas dins lo quartièr de Bhaile Uí Mhurchú, a Belfast. A partir d’alavetz aquel trist eveniment se coneisseriá coma lo Massacre de Ballymurphy.
 
Demest las victimas i aviá un prèire qu’ensajava d’ajudar los nafrats, e la maire d’uèch filhs. L’armada britanica fusilhèt nòu personas, mas la jutgessa a pas pogut establir qual tirèt sus la desena victima.
 
L’encargada de la justícia d’Irlanda del Nòrd, Naomi Long, a partejat sus son compte de Twitter que las familhas “an degut luchar tròp dur e pendent tròp de temps” per aquel verdicte, e demanda ara las excusas del govèrn britanic.


 



abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

I a un documental que mostra aquestes faits provocats pels folhs militars cresi que eran paracaigudistas super facha. Los excusas del Govern Britanic no basten s'ha de jutjar als militars criminals que ordenaren disparar contra la gent e los que o feren.

  • 3
  • 0

Escriu un comentari sus aqueste article