Bandièra01 1180x150: Comuna de Tolosa

Actualitats

Berlin a votat d’expropriar los apartaments dels grands proprietaris per evitar la gentrificacion

Se se’n respècta lo vòte, environ 240 000 apartaments vendràn publics per evitar la gentrificacion e l’aument del prètz de las rendas

| Deutsche Wohnen & Co Enteignen

Tèxte legit

Los abitants de Berlin an aprovat en referendum d’expropriar los apartaments dels proprietaris que possedisson mai de 3000 abitatges en aquela vila. Ara, la municipalitat deurà elaborar una lei que permeta d’expropriar aperaquí 240 000 apartaments, çò es l’11% dels lotjaments berlineses. Aqueles apartaments deuràn venir publics per evitar la gentrificacion e l’aument del prètz dels loguièrs que dins los darrièrs 10 ans s’es doblat.
 
Lo vòte s’es fach gràcias al collectatge de 343 000 signaturas de berlineses, lo doble de las necessàrias per forçar un referendum. Per que lo referendum foguèsse valid caliá que votèsse un quart de la lista electorala, çò es 611 900 vòtes, mas i an votat mai d’un milion de ciutadans, precisament 1 034 709 berlineses. Lo resultat es tanben clar: lo 56,4% dels vòtes èra en favor de l’expropriacion e lo 39% contra.
 
Los impulsors senhalan l’article 15 de la Constitucion alemanda que ditz: “Lo sòl, las ressorsas naturalas e los mejans de produccion pòdon èsser plaçats jos un regim de proprietat collectiva o de mai d’un biais de gestion collectiva per una lei que fixa la manièra e la soma de l'indemnizacion”. Pasmens, l’iniciativa va trobar d’obstacles politics e legals e, de tot segur, i aurà de recorses.
 
Lo pus gran damatjat seriá la societat immobiliària Deutsche Wohnen, que possedís environ 113 000 lotjaments a Berlin. La mesura tanben se repercutiriá sus d’autras societats coma Vonovia e William Pears Group.

 
abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Black Blòc Joe
1.

Aquò se ditz un Referendum d'Iniciativa Ciutadana, non ? Cossí un país ordoliberal, tant a dreita, pòt autorizar una accion ciutadana tant esquerrista coma aquesta ? Susprenent…

  • 1
  • 0

Escriu un comentari sus aqueste article