Bandièra01 1180x150: Comuna de Tolosa

Actualitats

crotz-tolosaCreated with Sketch.ProvençaProvençaPaís Marselhés

Un policièr a tuat un jove de 19 ans a Marselha

An dobèrt una informacion judiciària contra lo gardian de la patz per omicidi volontari e es provisòriament arrestat

Un policièr, del còrs dels gardians de la patz, qu’èra pas en servici, tuèt un jove de 19 ans après una altercacion, segon lo procuraire de la Republica. Lo parquet de Marselha, qu’a dobèrt una informacion judiciària per omicidi volontari, a fach arrestar lo policièr provisòriament. La tragèdia se debanèt la nuèch de dimècres a dijòus.
 
Lo policièr, pasmens, aviá drech de portar son arma de servici perque se trobava dins lo sieu sector, segon çò que declarèt a l’AFP lo director departamental de la Seguretat Publica, Pierre-Marie Bourniquel.
 
Lo parquet a demandat la detencion provisòria del gardian de la patz, segon çò que diguèt divendres passat lo procuraire de la Republica, Jacques Dallest, en un ponch de premsa.
 
La bala penetrèt per la patèrla del jove e toquèt los budèls, l’estomac e lo fetge, çò apondèt Dallest. Lo jove foguèt menat a l’espital ont moriguèt de matin.
 
Al delà, una autra informacion judiciària s’es dobèrta per violéncias en reünion e degradacion de bens contra un amic de la victima, qu’èra tornat de l’espital sus l’endrech de l’assassinat quand coneguèt lo decès del sieu amic. Pres per la colèra, encastrèt son auto dins l’especiariá ont se produguèt la tragèdia.
 
Segon las analisis toxicologicas, lo policièr aviá 1,26 grama d’alcòl per litre de sang e aviá fumat de cannabis.
 
La tragèdia arribèt quand lo gardian de la patz èra dins una especiariá a crompar de bièrras, e dos joves de 19 e 29 ans intrèron en fumant de cannabis. Aquò provoquèt la discussion qu’acabèt en batèsta. Lo jove de 19 ans tombèt lo policièr sus tèrra en li sautant dessús. Es aquí que lo gardian empleguèt son pistolet e tuèt lo jove. Los joves portavan pas cap d’arma.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article