Macarèl, l’entrepresa de merchandising occitanista, festeja son 20n anniversari e o fa lo 7 de mai que ven amb una festassa a Çaussan (Montpelhierenc). Aital, lo centre cultural que se tròba sus la Paça de la Font, aculhirà d’espectacles gratuits de l’umorista Florant Mercadièr, l’espectacle de Brassens en occitan amb Corne d’aur’Oc, e de balètis amb Arredalh e Santa Pachola. Sus plaça i aurà de restauracion, una beguda e un taulièr de Macarèl.
 
Macarèl es, dempuèi 20 ans, una referéncia per la socializacion de la lenga e la cultura occitanas en prepausant de drapèus, de camisetas, de pegasolets e d’autres produches que cèrcan de combatre la vergonha e de mostrar l’occitanitat amb fiertat e dignitat. Sos produches son presents dins la majoritat dels eveniments populars de tota Occitània, de las Valadas fins a Aran. Sos produches se pòdon trobar sul sit macarel.org e a la botiga de Tolosa que se situa en Carrièra del Taur.