Eth Conselh Generau d’Aran a anonciat ua seguida d’actes entà commemorar eth 80u anniversari dera mòrt de Jusèp Sandaran Bacaria, un des escrivans aranesi mès prolifics. En aguest sens, se declararà 2022 “An Sandaran”. Damb era collaboracion dera istoriana Maria Àngels Sanllehy e dera arrèrhilha der aumentajat, Eulàlia Sandaran, se realizarà ua seguida d’actes, coma era presentacion d’un libre sus es sues vida e òbra e un vidèo commemoratiu.
 
“En Aran auem dues figures subergessentes en camp dera lengua e era cultura, ua ei Mossen Condò e er auta, mens coneishuda, ei Jusèp Sandaran a qui, damb aguest reconeishement, volem méter en valor e dar a conéisher mès eth sòn legat e era sua òbra”, çò afirmèc era sindica d’Aran, Maria Vergés.
 
Jusèp Sandaran Bacaria neishec en 1875 en Canejan (Quate Lòcs) e moric en Barcelona 67 ans mès tard. Ère maridat damb Felipa Sambeat Romeva, tanben de Canejan. Toti dus demorèren longtemps en Barcelona. Se trobèc damb er escrivan aranés Jusèp Condò e eth felibre carcinocomengés Bernat Sarrieu.
 
Siguec un escrivan fòrça prolific en occitan e en catalan, e tanben traductor der anglés. Escriuec poèmes que presentèc en diuersi jòcs floraus e que sigueren publicadi en diuerses revistes coma Era Bouts dera Montanho. Escriuec tanplan fòrça sus es costums dera Val d’Aran, mès que mès de Canejan, e comencèc un projècte de gramatica aranesa a on amassèc mòts, arrepervèris e expressions populares en mès de 600 fiches. Aqueth trabalh culminarie en ua conferéncia que prononcièc eth 23 d’octobre de 1913 en Atenèu Obrèr deth Districte II de Barcelona entitolada “La Vall d’Aran i els catalans”.
 
Eth sòn hons lo podetz trapar en Archiu Generau d’Aran e en linha en Occitanica.



FM