Dos fraires d’un vintenat d’ans foguèron condemnats, dimècres passat, pel tribunal correccional de Marselha, a dètz e a sièis meses de preson per d’actes de violéncias comesas dins las urgéncias de l’Espital Nòrd.
 
Diluns, los dos òmes s’èran presentats a las urgéncias après un accident de la circulacion, mas un d’eles, en podent pas esperar mai, trenquèt una pòrta a còps de ponh. Dos gàrdias de l’establiment foguèron ferits dins l’altercacion.
 
Lo dimenge precedent, dins lo servici de las urgéncias del meteis espital, dos mètges foguèron victimas d’agressions. Un pacient tustèt un mètge perque esperava dempuèi longtemps, del temps que l’autra agression venguèt per un pacient que reclamava mai de jorns d’arrèst malautiá.
 
Lo Doctor Philippe Jean, cap del servici, parlava d’exasperacion e d’inquietud del personal per aquel nòu tipe de violéncia “non mestrejabla”, sovent “sus fons d’alcòl e de toxicomania”.
 
Al delà de las denóncias depausadas pels damnificats, lèu se menarà a tèrme, dins los establiments de l’Assisténcia Publica dels Espitals de Marselha (APÈM), d’accions de sensibilizacion dels usatgièrs suls actes de violéncia comeses dins l’espital, per remembrar que tota agression fisica o verbala cap al personal espitalièr serà perseguida per la justícia.