Katy Bernard es mèstra de conferéncias especializada en literatura medievala occitana a l’Universitat de Bordèu, Luc Lainé es vibrafonista, adobaire, compositor e improvisador, Matthieu Boisset es meteire en scèna, autor e comedian. Amassa, prepausan una lectura musicala o lectura-espectacle nomenada Lo Cant de Montfòrt. Lo tèxte legit es sortida d’una causida d’extraches, facha per Katy Bernard, de la Cançon de la Crosada albigesa, òbra en lenga occitana del sègle XIII, que conta las motivacions e las primièras dètz annadas (1209-1219) de la Crosada volguda pel papa Innocenci III, e que se tenguèt principalament sus las tèrras dels comtes Raimond de Tolosa e de lors vesins e vassals, per tal d’eradicar la dicha eretgia catara. Lo tèxt Lo Cant de Montfort soslinha l’expression del baujum e de l’aviditat del personatge de Simon de Montfòrt, baron crosat vengut lo capmèstre de la Crosada. L’espectacle nos pinta lo tablèu d’un personatge escur e crusèl a travèrs de qualques scènas causidas: lo buf de son agonia, la vision de sa mòrt escasuda a Tolosa coma un castig divin.
 
Katy Bernard per la votz occitana, Luc Lainé per la musica e Matthieu Boisset per la votz francesa fan se respondre lo tèxt original en occitan medieval, sa traduccion francesa e los sons electroacostics del vibrafòn aumentat per tal de far retronir al còr de nòstra epòca l’oralitat poetica del tèxt medieval, sa teatralitat, son testimoniatge istoric, que la poténcia ne demòra entièra.
 
Lo libre es acompanhat d’un CD e lo tèxt occitan es acompanhat d’una traduccion en francés.
 
 
 

---

BERNARD,Katy. Lo Cant de Montfòrt. Novelum IEO Perigòrd, Presse Fédéraliste, 2022. Libre e CD. 22 èuros.