Dimenge passat, de tibetans de tot lo Mond commemorèron lo Jorn del Soslevament de Tibet, en remembre de la revòlta de 1959 contra l’ocupacion chinesa que se debanèt dins la capitala de Lhasa. Ongan, la jornada es estada marcada per la terribla ondada d’immolacions de tibetans, en protèsta contra la repression chinesa que comencèt en març de 2011. Tre alavetz, se calcula que i a agut cent cinc suicidis en fòrça endreches del Tibet istoric e tanben en Nepal e Índia. Totes apareisson sus aquesta infografia d’Al Jazira.
 
Las immolacions, segon çò qu’explica la cadena qatarita, son de reaccions a una longa lista de grèuges; van de la protèsta contra l’ocupacion chinesa fins a al planh de las restriccions de la libertat de premsa, en passant per la critica contra la politica d’establiment de las comunautats nomadas dins de blòcs d’abitatges. Las proïbicions de l’usatge de la lenga tibetana son tanben una de las causas. Las convèrsas entre China e l’entorn del cap esperital de Tibet, lo dalai lama, se son arrestadas dempuèi 2010.