Bandièra01 1180x150: País Invisible

Actualitats

Lo conselh regional de la Reünion emplegarà lo creòl dins sas comunicacions oficialas

Lo francés contunharà d'èsser la sola lenga oficiala

| Duane.abgrall

Tèxte legit

Lo conselh regional de la Reünion a aprovat la carta Collectivitat Bilíngua, que deu permetre que l’administracion d’aquela illa administrativament francesa de l’ocean Indian comprenga la lenga insulara, lo creòl, dins sas comunicacions oficialas.
 
Demest las setze mesuras previstas pel document i a la senhaletica bilíngua francés-creòl dins las bastissas de l’administracion regionala o l’usatge del creòl dins la revista e lo sit web del govèrn. Se prevei tanplan que se pòsca emplegar lo creòl dins las intervencions dins los organs deliberatius de la region e que los representants politics se pòscan adreiçar en aquela lenga al public dins las comunicacions oralas.
 
Malgrat aqueles cambiaments, lo francés contunharà d’èsser l’unica lenga oficiala de la Reünion, coma de la rèsta del territòri de la Republica Francesa.
 
Lo creòl de la Reünion es una lenga espelida dins aquela illa de l’ocean Indian a l’epòca coloniala. Se basa sus de divèrsas varietats nòrd-occidentalas del francés europèu, amb d'apòrts d’autras lengas coma lo malgash, lo temil o l’indi.
 
Segon de donadas de l’INSEE, lo creòl es la lenga mairala de mai de l’80% de la populacion, malgrat que lo francés s’impause demest los mai joves. L’usatge del creòl es essencialament restrench al camp oral.
 
 
 
 
 
Aquesta nòva es adaptada de Nationalia, amb qui Jornalet ten un acòrdi de cooperacion.



abonar los amics de Jornalet

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
2.

A La Reünion, lo prefècte a pas reagit.
Benlèu, lo conse d'Elna deuriá demandar lo restacament de sa comuna a La Reünion.

  • 4
  • 0
Franc Bardòu
1.

Soleta questian que valga adara : Lo francés contunharà d'èsser la sola lenga oficiala, donc, cossí i czambiar qué que siá, que non siá mai la soleta, omai que quiite d'o èsser ? Cossí far de la lenga de l'isla la lenga oficiala de l'isla ? Question fondamentala…

  • 8
  • 6

Escriu un comentari sus aqueste article