Bandièra01 1180x150: Comuna de Tolosa

Actualitats

Iran: dos autres manifestants executats

A mai, la fotografa reputada Yalda Moaiery es estada condemnada a dos meses de trabalhs per la comunautat, e pendent dos ans poirà pas quitar lo país ni emplegar los rets socials

Tèxte legit

Las autoritats iranianas an assabentat de l’execucion de dos manifestants de mai que participavan a las protèstas contra lo regim en seguida de la mòrt de la jove curda Jina Amini. Mohamed Mehdi Karami e Mohamed Hosseini foguèron condemnats jos l’acusacion d’èsser los responsables de la mòrt d’un gardian de seguretat pendent una de las protèstas de novembre, çò a anonciat l’agéncia judiciària iraniana Mizan. Lo paire de Karami a denonciat una violacion del drech de la defensa dins lo jutjament.
 
Per ara son ja quatre los manifestants antigovernamentals executats dempuèi qu’espeliguèron las protèstas que viu lo país e que, segon las ONG localas, an un tragic bilanç de 470 mòrts.
 
D’autre caire, la magistratura iraniana a tanben informat que la fotografa reputada Yalda Moaiery es condemnada a dos meses de trabalhs per la comunautat per aver sostengut las protèstas. Moaiery trabalharà coma escobaira pendent dos meses dins un pargue per femnas e deurà escriure un assag de cent paginas sus un clèrgue iranian.
 
Lo verdicte foguèt comunicat per la quita fotografa dins un messatge sus Instagram, acompanhada d’un imatge ont es vestida amb l’unifòrme irange qu’ela deu portar pendent lo compliment de la pena.
 
La senténcia l’empacha tanben de quitar lo país pendent los dos ans que venon, e l’artista poirà pas emplegar son telefòn mobil ni los rets socials, ni mai demorar dins la capitala, Teheran, durant aquel meteis periòde.
 
 
 
abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article