Bandièra01 capçalera  1180x150: Novestivada

Actualitats

Gabriel Attal s’es desencusat per aver qualificat los maoreses d’immigrats

Aviá evocat “una immigracion importanta” de personas originàrias de Maiòta a la Reünion, çò qu’a escandalizat los politicians

Gabriel Attal s’es desencusat per aver qualificat los maoreses d’immigrats
Gabriel Attal s’es desencusat per aver qualificat los maoreses d’immigrats

Tèxte legit

Gabriel Attal, lo novèl ministre francés de l’educacion, presentèt sas excusas divendres passat après aver fach una declaracion controversiada sus l’immigracion maoresa dins l’illa de la Reünion pendent sa vesita. Lo ministre aviá evocat “una immigracion importanta” de personas originàrias de Maiòta e de Comòras escolarizadas a la Reünion, de prepauses que se son revelats erronèus e qu’an provocat una reaccion critica, çò rapòrta Libération.

En seguida de sos comentaris, la deputada centrista-regionalista de Maiòta, Estelle Youssouffa, a reagit sus Twitter, en soslinhant que i aviá pas d’immigracion maoresa a la Reünion. A exprimit son chepic sus la vision politica de talas declaracions.

De son latz, la cap de l’extrèma drecha Marine Le Pen, a egalament reagit, remembrant que los maoreses son de ciutadans franceses, e lo crida a se batre contra l’immigracion “clandestina” en defendent las frontièras de Maiòta.

Vista la polemica, Gabriel Attal a exprimit sos pentiments e reconegut que sa formulacion èra “maladrecha”. A insistit sul fach que los maoreses son de ciutadans franceses e a presentat sas excusas als elegits de Maiòta e a la comunautat educativa. A tanplan anonciat sa vesita venenta a Maiòta per trabalhar amb totes los actors de la comunautat educativa e metre lo ponch final a aquel “malentendut”.

Los prepauses controversiats se tenguèron pendent la vesita d’una escòla primària de la Possession a la Reünion, ont lo ministre aviá evocat los enjòcs restacats a la diversitat dels escolans. Los comentaris foguèron largament difusats per la cadena de television publica Réunion la 1ère, suscitant de reaccions immediatas e fòrtas.

De remarcar que, fòra dels limits de la Republica Francesa, l’immigracion interestatala es generalament compresa tanben coma immigracion.

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitèas
2.

Attal es un barjacaire que sap pas çò que ditz. Per el tot se resumís a ocupar lo fenestron e a charrar, charra que charraràs. Es un bon exemple d'òme politic de uèi. Un simptòma de la confusion entre comunicacion e projècte politic. El e los autres an fach l'ENA o Politecnica per arribar a aquò. E se n'i a un qu'aquò lo fa rire, que se remembre qu'es amb nòstres sòuses que selor pagan lors "estudis".

  • 5
  • 0
farfaneta
1.

Quand òm conèis pas grand causa sus lei realitats actualas, òm se cala Gabí !

  • 4
  • 0

Escriu un comentari sus aqueste article