Los Dragons an tornat trapar los camins de la victòria; cò de la lantèrna roja Wakefield. Mas, alara que menavan 18-0 a dètz minutas del tèrme, encaissavan dos ensages e ganhèron sus una marca de 18-10: +8 de diferéncia.

Se Wigan, Saint Helens e Dragons acaban a egalitat, la diferéncia entre punts marcats e encaissats serà capitala.

Wigan es lo melhor plaçat amb un +316; per ara, los Dragons son segonds amb +230 e Saint Helens tresen amb +217. Una diferéncia doncas de 13 punts entre las 2 formacions. Las marcas de las darrièras doas partidas seràn capitalas per fixar lo classament en rapelant que los primièrs dos son qualificats dirèctament per las mièjas finalas.

Divendres, Wigan reçaup Castleford e Saint Helens jòga a Warrington. Dissabte, los Catalans saupràn qué an de faire per la recepcion de Leeds.

Tolosa-Featherstone: la repeticion

La desfaita de Tolosa en Championship 18-26 a Halifax remet pas en causa la segonda plaça dels occitans. Dissabte, als Minims, los Blanc e Blau reçaupràn los primièrs, Featherstone, per çò que poiriá èsser la prefiguracion per la finala e la montada en Superliga dins una partida que se jogariá en Anglatèrra.

NRL: Penrith e Brisbane en mièja finala

Es lo temps de las pelhòfas en Austràlia. Dins lo naut del tablèu, resultas logicas amb las victòrias, a la fin de partidas de sens unic, divendres de Brisbane fàcia a Melbourne 26-0 e dissabte de Penrith fàcia als neozelandeses: 32-6. A Melbourne, Papenhuyzen, que tornava trapar lo terren aprèp una longa abséncia en rason d’una nafradura al genolh, se fractura la cavilha.

Dins lo bas del tablèu, las partidas foguèron mai disputadas. Los Polets van ganhar 13-12 a Cronulla ont lo dobertura se fa contrar, dins las darrièras minutas, sas doas temptativas de tombat.

A Newcastle, dimenge, la partida va fins a las prolongacions ont Ponga passa la penalitat de la ganha per Newcastle fàcia a Canberra (30-28).

En partida de barratge, divendres Melbourne reçauprà los Polets e, dissabte, Newcastle anirà jogar a Auckland.

Un president (gaireben) novèl

Una amassada de la Federacion se teniá aqueste dissabte a Brutus. En tota logica, es Domenge Baloup qu’assegurava l’interim aprèp la demission del president Lacòsta, que pren la direccion de l’estructura e anóncia que serà candidat pel mandat 2024-2028.

anóncia partida Policièrs NSW-Occitània (15/09)

anóncia partida TO-Featherstone (16/09)

anóncia partida Dragons-Leeds (16/09)