Bandièra01 1180x150: País Invisible

Actualitats

Rugbi de XIII: la vida en ròse pel XIII de França femenin

Las formacions femeninas de França e de Galas a Domèc
Las formacions femeninas de França e de Galas a Domèc | Astreizix

Tèxte legit

Las tribunas de Domèc èran plan garnidas aqueste dimenge 29 d’octòbre de vèspre per seguir la partida entre las formacions femeninas de França e de Galas. Las Blavas joguèron un ton ensús per ganhar 14-4. Una partida jogada jol signe d’Octòbre Ròse, lo mes consacrat a la luta contra lo càncer de las popas.

Doas partidas en retard de la competicion d’Elèit 1 se jogavan aquesta dimenjada. Dissabte, passejada de santat per Lesinhan que marca dotze ensages a una pallòta formacion avinhonenca: 70-6. Dimenge, Carcassona pren lèu-lèu la mesura de la formacion pianenca e ganha 38-16.

Pel compte de la cinquena jornada, dissabte, las tres esquipas audencas reçaupràn: Limós-Albi (15h30), Lesinhan-Pià (17h) e Carcassona-Dragonets (18h). Avinhon se desplaçarà a Vilanòva. Dimenge, se jogarà lo dèrbi de la Nauta Garona: Tolosa-St Gaudenç.

En Elèit 2, los Lops de Vilafranca de Roergue an pres logicament lo cap de la competicion, alara que Palau, Entraigas e Selon espèran una primièra victòria que va arribar per una de las 2 formacions provençalas, vist que se rescontraràn aqueste dissabte 4 de novembre.

Aqueste dimenge 5 de novembre, l’esquipa de França de 13-cadieral, que nomenan ara pararugbi, anirà desfisar la formacion anglesa, campiona del Mond, a Leeds abans de la reçaupre lo 25 de novembre al Palais dels Espòrts de Marselha.

 

Cangorós e angleses ganhan

 

A Melbourne, se per un còp las neozelandesas capitan de batre las australianas, 12-6 , del costat dels òmes los Cangorós demòran los mèstres: 36-18.

Fiji se va impausar largament en Papoa: 43-18.

Anglatèrra empòrta la segonda partida fàcia a Tònga sus la pelena d’Huddersfield: 14-4. Tresena partida dissabte de vèspre a Leeds: los jogaires del Pacific ensajaràn de ganhar la partida.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

L'Alan
1.

Vilafranca,…… son en Elèit 2, pas 3 ! Excusas………

  • 0
  • 0

Escriu un comentari sus aqueste article