Bandièra01 1180x150: Comuna de Tolosa

Actualitats

Los presonièrs bascos accèptan la legislacion penitenciària de l’estat espanhòl

Reconeisson lo patiment e los damatges qu’an generat e fan un renonciament exprès “al metòde qu’an emplegat dins lo passat”’. Cercaràn de sortidas individualas a lor situacion.


Lo Collectiu dels Presonièrs Politics Bascos (EPPK) es dispausat a facilitar que lo procès de solucion dels empresonats siá escalonat, basat sus la legislacion penitenciària de l’estat espanhòl, de manièra individuala e dins un relambi prudent, coma o demandava lo Forum Social per la Patz. O anoncièt dissabte passat dins un comunicat mandat als jornals Gara e Berria, que publican tanben lo vidèo amb l’anonci fach per una de las pòrtavoses, Marixol Iparragirre.
 
Dins aquel comunicat, los del collectiu manifèstan un renonciament exprès “al metòde qu’an emplegat dins lo passat per afrontar l’imposicion, la repression e la vulneracion dels dreches” e lor engatjament amb lo nòu scenari dobèrt. E apondon: “Reconeissèm amb tota sinceritat lo patiment e lo damatge multilateral generats”.
 
Dison qu’assumisson tota la “responsabilitat sus las consequéncias” de lors accions e manifèstan la “volontat d’analisar la responsabilitat” de caduna d’elas, “dedins un procès convengut qu’amasse las condicions e las garentidas sufisentas”.
 
“Poiriam acceptar que lo nòstre procès de retorn a l’ostal —la nòstra sortida de preson e de manièra prioritària lo nòstre desplaçament al Bascoat— s’efectuèsse en emplegant de vias legalas, e mai s’aquò compòrta per nosautres, implicitament, l’acceptacion de la nòstra condemna”, çò afirman.
 
De mai, fan una crida als ciutadans, a las institucions, als agents e als partits per cercar un “larg consens que faga possible lo retorn a l’ostal, dins l’encastre d’un procès integral, que meta pas en question” lor “caractèr ni dignitat politica”, e anóncian que dobriràn de contactes amb lo Forum Social per la Patz e amb d’autres agents bascos per cercar d’acòrdis.
 
 
“Una contribucion unilaterala de granda importància”
 
L’esquèrra independentista basca considèra l’anonci coma una “contribucion unilaterala de granda importància” e demanda al govèrn espanhòl de “començar de far de passes”.
 
Lo dirigent de Sortu, Joseba Permach, diguèt sus son Twitter que s’agís d’una “contribucion unilaterala de granda importància”; e Rafael Larreina, d’Eusko Alkartasuna, que lo pas de l’EPPK èra fruch de “l’esfòrç de la societat basca”. Larreina critica “l’obsession qu’an qualques unes per levar d’importància als passes que fa lo collectiu de presonièrs d’ÈTA”, a aqueles que considèran que “tot arriba tard, que tot es insufisent e qu’exigisson mai e encara mai”.
 
De son costat, la secretària d’organizacion d’Aralar, Rebeka Ubera, soslinhèt que lo collectiu dels presonièrs d’ÈTA aviá assumit sa “responsabilitat” quant al conflicte, “çò que fan pas los autres agents implicats”. Ubera crei qu’amb aquel comunicat los presonièrs se reafirman sul camin començat fa longtemps e dins l’engatjament per lo procès de patz que viu lo pòble basco”. Dins aquel sens, Ubera faguèt una crida als diferents agents e institucions per qu’agiguèsson “al meteis nivèl”.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Iruñerritarra naiz IRUÑEA, NAFARROA-NAVARRA, EUSKAL HERRIA-BASCOAT
4.

#1 ``Una autra evolucion desirabla, dins un autre domeni, serà quand lo movement basco admetrà lo caractèr occitan dau Bas Ador, de Baiona, d'Anglet e de Biàrritz.´´ Sò d'acòrd, mès tanben seriosa ua evolucion importanta ena mentalitat en movement nacionalista gascon-occitan arreconéisher eth caractèr (tanben) basc-navarro dau Bas Ador, Baiona, Anglet e Biarritz.
Jo sò independentista basc-navarra e demani ambdues causes, qu'es/as independentistes basc-navarros arreconeishen qu'aguestes zònes son TANBEN gascones (e occitanes) e qu'es independentistes gascons-occitans arreconeishen qu'aguestes zònes son TANBEN basques-navarras.

P.D Gascon=vascon romanizat.

  • 0
  • 1
Pèire Cardenal Jr. Velai
3.

Es una evolucion importanta dins la mentalitat dau movement nacionalista basco.

Una autra evolucion desirabla, dins un autre domeni, serà quand lo movement basco admetrà lo caractèr occitan dau Bas Ador, de Baiona, d'Anglet e de Biàrritz.

  • 3
  • 0

Escriu un comentari sus aqueste article