“Litteul Kevin es orfanèl”, es aital que l’editor Le Lombard a anonciat la mòrt de Coyote, lo celèbre dessenhaire roergàs. Coyote moriguèt dimenge passat 9 d’agost, a Tolosa, dins sos 52 ans, de las seguidas d’un accident cardiac, segon çò que rapòrta Le Figaro.
 
Lo dessenhaire de Rodés refusèt totjorn de donar son nom oficial. “Perque mon nom es Coyote, ponch a la linha. Quitament dins la familha me nomenan aital”; çò diguèt en 2009 a LaDépêche du Midi.
 
Èra lo creator de la sèria Mammouth & Piston e un collaborador de la revista Fluide Glacial, ont desvolopèt lo personatge de Litteul Kevin, un dròlle que li agrada d’atissar sos parents e de córrer sus sa mòto Harley-Davidson. Aquel personatge aviá lo quite imatge del cretor. Sos darrièrs obratges foguèron la sèria Les Voisins du 109 e lo darrièr tòme de Litteul Kevin apareguèt en 2013.
 
“Jos aquela aparéncia de gròs dur amagava fòrça tendresa e generositat”, çò an dich en cò de l’editor Le Lombard, en tot remembrar una de sas frasas: “far de libres e un enfant, es tot çò qu’ai trobat per venir immortal”.


 
#coyote tuits