Lo periòde d'inscripcions pel DCL en occitan s'acaba dins dètz jorns. Aquel examen oficial que certifica la competéncia de la lenga se tendrà lo 25 de mai dins de centres administrats per las acadèmias de Bordèu, Montpelhièr, Niça e Tolosa. Vos podètz inscriure en linha sul sit del DCL fins al 28 de març.
 
Lo DCL es la sigla de Diplòma de Competéncia en Lenga, e se tracta d’un examen oficial de l’estat francés que servís per certificar las competéncias de la persona examinada en occitan, e en un dotzenat de lengas. L’espròva simula una situacion de la vida vidanta ont lo participant deu jogar un ròtle. Après escotar d’àudios, veire de vidèos e parlar al telefòn, l’examinat resolverà una situacion e ne farà un rapòrt. Lo resultat de l’espròva decidirà qual es lo nivèl de competéncia, dins lo quadre europèu de referéncia, dels nivèls A1 fins a C1.
 
Los conselhs regionals prenon normalament en carga una partida de las despensas d’inscripcion.