Un jutge brasilièr ordenèt diluns passat de blocar l’aplicacion Whatsapp pendent 72 oras dins tot lo país. La rason es que la companhiá californiana refusèt de revelar d’informacions d’usatgièrs liats a d’enquèstas sus narcotrafec. Es pas lo primièr còp que la justícia brasilièra pren aquela mesura. En decembre de l’an passat, un jutge de São Paulo aviá ordenat de blocar l’aplicacion pendent quaranta uèch oras, mas puèi, un autre jutge o aviá revocat.
 
Aperaquí cent milions de brasilièrs emplegan Whatsapp a l’ora d’ara. Es l’aplicacion mai emplegada pels internautas d’aquel país (93%), segon un sondatge divulgat a la fin de l’an passat. En decembre, la suspension foguèt una bona nòva per la concurréncia, coma l’aplicacion Telegram. Solament vint minutas après lo blocatge, Telegram recebèt mai d’1,5 milions de descargas.