Se commemòran los vint ans del començament de la guèrra en Bòsnia, mai que mai a Sarajevo, ont los paramilitars sèrbes menèron a tèrme un sètge long e crusèl dempuèi la vesina vila de Pale, çò que portèt la mòrt de mai de dètz mila civils. Un concèrt es estat organizat davant 11 541 cadièras vuèjas en remembre dels abitants assassinats pendent los mil quatre cents cinquanta jorns d'atacas. S'i presenta tanben lo Musèu del Sètge.

Parallèlament, mai d'un centenat de jornalistas e de raportaires fotografes que raportèron lo sètge se son amassats tota la setmana a Sarajevo, per remembrar e partejar aquela experiéncia.



Tre los acòrdis de patz de Dayton, negociats fin finala per la pression internacionala, Bòsnia e Ercegovina demorèt dividida en doas entitats, la Republica Sèrba de Bòsnia e la Federacion de Bòsnia e Ercegovina, anciana Federacion croatomusulmana. Caduna a una  autonomia granda e son jonchas per d'institucions centralas flacas e sens dialòg. La division politica a de consequéncias sus l'economia del país, un dels mai paures d'Euròpa ont 40% dels abitants son al caumatge e 25% viu en pauretat extrèma segon l'ONU.




Imatges de las 11 541 cadièras vuèjas en memòria a las victimas del sètge de Sarajevo