Bandièra01 1180x150: Comuna de Tolosa

Actualitats

Rugbi de XIII: Dragons, e una esquipa nasquèt a Hull

Una brava victòria catalana sus la pelena d’Hull-FC
Una brava victòria catalana sus la pelena d’Hull-FC
Las causas se meton en plaça en Superliga; la NRL va tornar prene e la Copa Lòrd-Derby defugís ongan las suspresas.
 
 
Superliga: lo pè magic de Luke Walsh
 
Aqueste dijòus de ser, res podiá pas arrestar los Dragons sus la pelena destrempada d’Hull. La tempèsta Dorís daissèt jogar la partida e las nívols negras prenguèron la forma dels jogaires locals dins una partida nharruda: dos cartons jaunes (un de cada costat), Baitieri sul rapòrt e quatre catalans tornan nafrats de l’afrontament: Aiton, Bosquet, Moa e Baitieri. Foguèt pas un rugbi de fèsta, mas un imne a l’engatjament e a la solidaritat. L’arbitre poguèt faire un concèrt fiuletaire e l’indisciplina dels angleses finiguèt que lor costèt la partida. Luke Walsh ensaquèt cinc penalitats e una transformacion. L’ensag catalan venguèt d’un passatge en fòrça de Greg Bird entre dos davants negres, una liberacion per Tomàs Bòsc que fixava l’arrièr e metiá sus orbita lo mesclanha Myler. Victòria catalana: 16-14. Dissabte, a Brutus, los catalans an rendètz-vos amb los Vikings de Widnes que demòran sus doas desfaitas. Doncas, pas lo temps de se pausar suls laurèls…
 
La desfaita foguèt amarga pels Vikings: 26-28 contra Wigan. Los Tigres arputs de Castlefòrd anèron ganhar cò dels Lops de Warrington: 30-22. Dins las autras tres partidas, avantatge a las formacions que jogavan a l’ostal: Huddersfield bat Wakefield 24-16, Leeds ganha contra Salford 20-14 e Leigh l’empòrta sus Saint Helens: 24-16.
 
 
Championship: Bradford demòra Bradford
 
En desplaçament en Anglatèrra, Tolosa, despassat dins lo primièr temps (6-22), coneguèt fin finala una corta desfaita cò de Bradford: 29-22. Novèl viatge aqueste dimenge 5 de març: cò d’Halifax.
 
 
Copa: los audencs en fòrça
 
Ongan, la Copa a causit la logica e los audencs se trapan en posicion de fòrça: tres presents per la mièjas finalas que seràn tiradas al sòrt aqueste dijòus de ser dins los locals de la Federacion a Carcassona.
 
Tre dissabte, Lesinhan s’anèt qualificar a Sent Gaudenç 50-10. Dimenge, Limós s’impausèt a Vilanòva 16-2 e Carcassona daissèt a distància los catalans de Baó: 36-18. Lo quatren qualificat es Albi qu’anèt ganhar cò dels Lops de Vilafranca: 46-20.
 
 
NRL: La represa
 
La debuta del mes de març marca en Austràlia la represa del campionat de NRL. Los primièrs a jogar seràn los campions, las Làmias de Cronulla, que recebon aqueste dijòus los Bròncos de Brisbane. Seguiràn divendres: los Dògols contra la Tempèsta de Melbourne, los Lapinons contra los Tigres; puèi, dissabte: los Dragons contra las Pantèras, los Vaquièrs contra Canberra, los Titans contra los Poletons; e dimenge: los Combatents neozelandeses contra Newcastle e las Aglas de mar contra las Anguialas de Paramatta. En un mot: lo grand ferum se torna lançar sus las pelenas e avèm l’astre de poder seguir qualques partidas mercé a las retransmissions de BeInSport.
 
 
A taula
 
Dimenge 12 de març, serà lo dèrbi bèl entre Carcassona e Lesinhan a l’estadi Domèc amb lo doble afrontament: juniors (14h) e Elèit 1 (16h). Las partidas seràn precedidas d’una brava taulejada: ensalada lipeta, vedèl e patanas sarladesas, formatges, meleta norvegiana e vins de Limós. Se cal marcar (sens tardar) al prèp del secretariat de l’AS Carcassona XIII: +33(0)4 68 47 74 74.
 
 
 
 
Alan Roch
 
 
 
 


abonar los amics de Jornalet
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article