Bandièra01 capçalera  1180x150: Novestivada

Actualitats

Un resultat istoric del Sinn Féin qu’a perdut l’eleccion per un 0,15% dels vòtes

Lo Partit Unionista Democratic es lo ganhant de l’eleccion legislativa de l’Irlanda del Nòrd, mas per un marge talament estrech que deurà far de paches per formar un govèrn

Segon Gearóid Mac Ádhaimh, “l’eleccion a mes lo ponch final a la majoritat unionista dins l’assemblada”
Segon Gearóid Mac Ádhaimh, “l’eleccion a mes lo ponch final a la majoritat unionista dins l’assemblada” | Sinn Féin
 
Lo Partit Unionista Democratic del Nòrd d’Irlanda (DUP) a ganhat per un estrech marge l’eleccion legislativa de dijòus passat. Lo lent recompte dels vòtes prenguèt fins a dissabte, ont s’anoncièt que los unionistas ganhèron de 28,06% dels vòtes, del temps que lo Sinn Féin n’obtenguèt lo 27,91%, çò es un resultat istoric pel partit irlandista.
 
Amb solament mila vòtes de distància, lo DUP a obtengut 28 deputats suls 90 que ten l’assemblada d’Stairmhonaidh, del temps que lo Sinn Féin n’a obtengut 27. Es atal, amb un sèti de diferéncia, que los dos partits deuràn tornar negociar per fin de constituir un nòu govèrn per Cúige Uladh.
 
Aquela eleccion, la pus esquichada de l'istòria del Nòrd d’Irlanda, se debanèt dijòus en seguida de la crisi de govèrn que faguèt tombar l’executiu de Béal Feirste. Desenant, los partits an tres setmanas de relambi per formar un govèrn consensual se vòlon evitar que las competéncias transferidas tornen al parlament britanic. La lei prevei aquel retorn del poder legislatiu a Londres: en cas d’una situacion de blocatge, lo govèrn britanic pòt retirar las competéncias a l’Irlanda del Nòrd e governar dirèctament aquel territòri.
 
Lo debat sul Brexit es estat plan present dins aquelas eleccions. Lo ministre britanic per l’Irlanda del Nòrd assolidèt que l’eleccion nòrd-irlandesa afectariá pas brica l’activacion de l’article 50 de tractat de Lisbona, que permetrà la sortida del Reialme Unit de l’Union Europèa.
 
Fa qualques jorns, lo primièr ministre irlandés Éanna Ó Coinnigh exigiguèt a Brussèlas que l’acòrdi del Brexit prenguèsse en compte un possible retorn de l’Irlanda del Nòrd a l’UE e quitament que “se considerèsse la possibilitat d’un referendum de reünificacion” de l’illa.
 
 


abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

A veire si los irlandeses republicans del Sin Fein poden far una coalicion amb un partit petit, ecologistas, animalistas, fumadors en pipa, qualsevols per poder governar.

  • 3
  • 0

Escriu un comentari sus aqueste article