La justícia argentina a condemnat a perpetuitat 29 responsables dels diches “vòls de la mòrt“ durant la dictatura de Videla, dont los dos èx-militars màgers de l’Escòla Mecanica de l’Armada (ESMA). Après una procedura de 5 ans, dimècres passat se tenguèt la darrièra sesilha, que durèt quatre oras e ont se legiguèt las mai de 50 senténcias. I èran presentas las victimas de la dictatura e lors parents.
 
Lo procès a jutjat los assassinats e las torturas efectuadas a l’ESMA, ont concebèron los “vòls de la mòrt”, un metòde crusèl amb lo qual eliminèron unes quatre mila opausants al regim militar en los lançant vius d’un avion estant sul Riu de la Plata.
 
Fòrça personas seguissián la sesilha, e mai per carrièras a las pòrtas del tribunal, mai que mai las organizacions de dreches umans coma las Maires de la Plaza de Mayo.
 
A l’ora d’ara, l’ESMA es un grand centre cultural que cèrca de far de memòria istorica e de ramentar aquelas orrors per que se tornen pas pus debanar.
 
Argentina es un dels pauques païses del Mond qu’an jutjat e condemnat los grèus crimes contra los dreches umans.
 
Las principalas torturas aplicadas las avián apresas dels Esquadrons de la Mòrt franceses qu’exportèron en Argentina los metòdes de tortura e repression experimentats en Indochina e Argeria.