Bandièra01 1180x150: País Invisible

Opinion

Bob Marley e lo fotbòl

Matieu Casanòva

Matieu Casanòva

Licenciat d’Istòria a l’UPPA (Bearn), ancian jornalista de Ràdio País, ara sòci de l’Ostau dau País Marselhés.

Mai d’informacions
“Es lo destin”: es coma aquò que se pòt resumir leis istòrias mai tristas. Uei se va parlar d’un òme qu’auriá pogut èstre una estela dau balon, mai qu’a preferit la musica reggae: de segur es Bob Marley. Robert Marley nasquèt en 45 dins un país, Jamaica, qu’es afogat de fotbòl e que jogava coma nacion e mai abans son independéncia. Lei sòcis dei Wailers, lo grop de Bob Marley, son totei tanben amorós dau balon. E mai lo melhor amic de Bob, Alan Cole, èra considerat a l’epòca coma lo melhor jogaire de Jamaica.
 
Per lei nombrosei tornadas internacionalas, lei Wailers installèron una television dins lo bus per seguir lei partidas de fotbòl. Tanben esitavan pas jamai per organizar de partidas còntra lei jornalistas locaus, abans un concèrt. Dau testimoniatge deis actors de l’epòca, sabèm que lo Bob Marley aviá de talent, bensai pron per aver pogut considerar una carriera professionala. Fatalitat dau destin: es un encòntre de fotbòl que foguèt, en partida, a l’origina de la desparicion de la legenda dau reggae.
 
En 1977, se debana a París un match amb lei Wailers, de jornalistas francés e de mond dau showbiz. L’esquipa jamaicana ajudada dei jornalistas ganha la partida 6 a 1, mai Bob es sortit a la pausa, una vielha nafra au pè s’es redobèrta. Un pauc pus tard, un mètge li conselha de pas pausar lo pè au sòu pendent quauquei setmanas, mai l’album famós Exodus ven de sortir e Marley vòu pas renonciar ai concèrts prevists un pauc pertot dins lo Mond. Pasmens la fin de la tornada es anullada, la dolor es tròp fòrta. E per causa: un debut de càncer es diagnosticat.
 
Un jorn de 1980, qu’es a córrer amb son amic Alan Cole a Nòva York, Bob Marley s’afondra, victima aqueste còp d’un càncer dau cervèu. Una quimioterapia poderosa i farà ren: lo rei dau reggae se morís l’11 de mai de 1981. Quauquei setmanas abans, poguèt festejar son anniversari amb leis amics, en agachar a la television… un documentari sus lo mai grand fotbolaire de l’istòria, lo Rei Pelé.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

pep Nine Mile
1.

Corregissi l'asenada plan comuna encara uèi: lo sieu cancèr (e lo de pas dingús) ven pas d'una plaga al pè, mas de l'acidificacion globala de son còs, deguda al fumar, al dormir pauc (ensajava juscas a tard), enfin al fach de s'agotar fisicament en non pas mainatjar sos esfòrces. Ajosti tanben que Bob Marley e los Wailers jogaires (totes los membres del grope essent pas futbolaires) faguèron un 0-0 contra lo FC Nantes campion de França.

  • 0
  • 0

Escriu un comentari sus aqueste article