Bandièra01 capçalera  1180x150: Novestivada

editorial

Lo govèrn contra lo pòble

| La repression policièra contra una protèsta de liceans dins l'Illa de França es un exemple de mai de brutalitat policièra
Dins l’estat espanhòl, e doncas en Aran, l’edat de la retirada ven d’èsser establida a 67 ans, valent a dire 3 ans de mai que çò d’impausat per la reforma del govèrn francés. Totun, i a pas agut de protèstas socialas ni sindicalas. La rason ne son las formas: lo govèrn espanhòl a negociat sa reforma amb los sindicats qu’an obtengut una baissa considerabla del nombre d’ans cotizats per se poder retirar.
 
Dins l’estat francés, e doncas gaireben en tota Occitània, la reforma s’es impausada sens debat parlamentari e amb la majoritat de la societat francesa contrària a la mesura —segon çò que soslinhan totes los sondatges d’opinion—. Dins aquel encastre Macron a causit la via de l’autoritarisme, non solament amb l’aplicacion del 49.3 mas amb la repression de las protèstas. Una deriva autoritària vertadièrament inquietanta.
 
La Liga francesa dels Dreches de l’Òme (LDH segon sa sigla en francés) acusa las autoritats francesas de comprometre “lo drech de contèsta dels ciutadans en tot far un usatge desproporcionat e perilhós de la fòrça publica”. Lo Conselh Europèu e divèrsas ONG de dreches an escotat l’LDH e an tanben denonciat la brutalitat policièra. Mentretant, lo ministre de l’interior Gérald Darmanin vòl que l’LDH tenga pas pus de finançament public. Aquel deriva autoritària seguís l’anóncia que lo quite Darmanin faguèt de dissòlver lo movement ecologista dels Soslevaments de la Tèrra, un dels collectius que cridèron a manifestar contra la megarestanca a Sainte-Soline (Peitau) los 25 e 26 de març passats, ont la repression policièra daissèt un fum de nafrats, dont qualques unes en estat fòrça grèu. De fach, Darmanin  assabentèt de “441 policièrs e gendarmas nafrats” lo 23 març, dins la novena jornada de cauma contra la reforma de las retiradas, mas i a pas cap de comunicacion oficiala sul nombre de manifestants nafrats. Aquò es, net e clar, lo govèrn contra lo pòble.
 
Es evident, doncas, que lo malèsser popular es mai que mai una reaccion a aquela deriva autoritària. De veire se las esquèrras seràn capablas de dialogar e de s’organitzar contra lo despotisme o se serà l’extrèma drecha de Le Pen que tirarà profièch del malèsser, e mai siá per que càmbie pas res.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

ltrobat
4.

#2
Que n'i a que creden que le debat public se va har enter l'esquerra e Marina le Pen.
Jo que'n conseishi un que credèva que "lo mes de mars se passera pas sens que la veritat siaja coneiguda. Coma en 1945 porria i aver daus tribunaus de Nuremberg.".
Estonable, non?

  • 11
  • 8
Lachaud Pierre
3.

Si creses que lo desbat en politic vai se far entre l'esquerre e Marina lo Pen, te trompas grandament.
Quò es ben la paubretat dau discors de l'esquerre que nurit Marina Lo Pen e apaubrit la politica.

  • 5
  • 5
Lachaud Pierre
2.

Si creses que lo desbat en politic vai se far entre l'esquerre e Marina lo Pen, te trompas grandament.
Quò es ben la paubretat dau discors de l'esquerre que nurit Marina Lo Pen e apaubrit la politica.

  • 6
  • 5

Escriu un comentari sus aqueste article