Bandièra01 1180x150: País Invisible

Actualitats

Lo govèrn francés vòl impausar la polemica reforma de las pensions sens debat parlamentari

La decision d’invocar l’article 49.3 de la Constitucion a indignat los partits de l’oposicion qu’an anonciat de mocions de censura contra Emmanuel Macron

Tèxte legit

Emmanuel Macron vòl impausar la polemica reforma de las pensions sens passar pel vòte de l’Assemblada Nacionala francesa. Lo govèrn de sa primièra ministra, Elisabeth Borne, a invocat l’article 49.3 de la Constitucion per la far aprovar. Aquela decision a indignat los partits de l’oposicion e los sindicats e es a generar una avalanca de protèstas.
 
Ièr dijòus, qualques minutas abans que comencèsse la sesilha de l’Assemblada, a 15h, lo govèrn francés decidiguèt de recórrer a l’article 49.3 de la Constitucion francesa, que permet al primièr ministre d’engatjar sa responsabilitat sus un tèxt de lei e de lo far adoptar sens l’aprobacion dels deputats. Los deputats de la coalicion esquerrista NUPES comencèron de cantar La Marseillaise en signe de protèsta del temps que los deputats de l’extrèma drecha cridavan “demission!” a la primièra ministra, Elisabeth Borne. Ela ensagèt de parlar als deputats per justificar l’usatge del 49.3: “Podèm pas prene lo risc de veire 175 oras de debats parlamentaris s’esfrondrar”. Pus tard, Macron se justifiquèt: “Soi pas ieu que risqui mon sèti, mas considèri qu’en l’estat, los risques financièrs e economics son tròp grands”. Sul pic, de milièrs de personas se gandiguèron davant lo palais Borbon per protestar, seguidas per de recampaments espontanèus dins d’autras vilas dont las occitanas Bordèu e Baiona.
 
Segon aquela disposicion constitucionala, se considèra aprovada la reforma de las pensions, levat que se presente, abans uèi a 15h20, una mocion de censura que poiriá tombar lo govèrn. An anonciat que la presentarián aitant Marine Le Pen, del Recampament Nacional, coma Mathilde Panot, la cap dels deputats de La França Insomesa, que considèra l’usatge de 49.3 coma un gèst autoritari per aprovar una reforma d’aquela importància. La mocion de censura mai riscada pel govèrn Borne la poiriá presentar lo grop centrista regionalista LIOT del deputat Charles de Courson: transpartisana, poiriá recebre lo supòrt de totes los opausants, quitament los parlamentaris LR contraris a la reforma.
 
Lo Senat veniá d’aprovar lo meteis jorn aquela polemica lei de reforma de la retirada e lo tèxt deviá èsser aprovat per l’Assemblada Nacionala francesa que deviá votar dins lo tantòst. Mas lo vòte de la cambra bassa generava incertitud, pr’amor que se sabiá pas se la majoritat presidenciala aviá pro de vòtes per reüssir. Lo Senat l’aviá aprovada amb 193 vòtes en favor, 114 en contra e 38 abstencions.
 
La proposicion de la nòva lei prevei d’alongar l’edat legala de la retirada de 62 a 64 ans a partir de 2030 e d’exigir, a partir de 2027, 43 ans d’escotissons per recebre una pension completa. “Aqueste an serà, d’efièch, lo de la reforma de las pensions de retirada”, çò assegurava Macron dins son discors de Cap d’An.
 
Tot aquò a indignat los sindicats, que manifèstan dempuèi qualques setmanas per las carrièras de las principalas vilas de l’estat francés, dont las occitanas. Lo 7 de març, dins la tresena jornada de cauma, 3,5 milions de personas se mobilizèron segon la CGT.
 
La reforma de las pensions de retirada compta pas sul sosten popular. Dins l’Assemblada Nacionala francesa, los partits d’esquèrra, de centristas, l’extrèma drecha e quitament qualques deputats conservators dels Republicans s’i opausan.

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
3.

E n'i a que creson que sèm encara en democracia. Espèri lors puntets roges. Aital aurem una idèa del percentatge de motons al país.

  • 4
  • 4
L\'Etat c\'est moi, na ! Made in Paris
2.

Es dins aquelas escasenças que l'especificitat totalitària de l'Estat centralista francés, qu'es abitualament menimosament amagat jos un fais d'eufemismes, se desvèla al grand jorn. En clar es de longa e totjorn "L'Etat c'est moi".

  • 5
  • 4
Galo Puech sericon
1.

L'ora es bona, anem parar lo lop !

  • 8
  • 3

Escriu un comentari sus aqueste article