Bandièra01 capçalera  1180x150: Novestivada

editorial

Ongan i aurà Estivada

Ongan i aurà Estivada
Ongan i aurà Estivada

Ongan i aurà Estivada. O raportàvem amb jòia dimars passat. La còla de l’associacion La Gardarem es a organizar la Nòv’Estivada, amb l’esperit de festenal de la cultura occitana, los 26 e 27 de julhet a Sebasac, al Causse Comtal, a 7 km al nòrd de Rodés. Aquela associacion sortida del collectiu Gardarem l’Estivada trabalha dempuèi las darrièras annadas per far renàisser lo festenal de la cultura occitana e reviudar l’esperit autentic d'aquel eveniment cultural màger.

L’Estivada foguèt pendent qualques annadas lo ponch de referéncia de la creacion culturala en occitan, qu’arribèt quitament a amassar de representants de uèch regions occitanas per parlar de politicas lingüisticas. Mas, en 2015, la comuna de Rodés prenguèt la decision controversiada de cambiar la còla qu’organizava amb un brave succès lo festenal, e o faguèt d’un biais fosc amb de menaças e coaccions. En seguida, en profechant lo vam de l’Estivada, tresmudèt lo festenal occitanista en un eveniment mainstream dich F’estivada completament desoccitanizat. A comptar d’alavetz, lo collectiu Gardarem l’Estivada entamenèt un brave trabalh qu’ongan comença de capitar ben e que volèm saludar.

La primièra edicion de la Nòv’Estivada comença ongan amb de ressorsas modèstas. Pasmens, comprendrà de concèrts en occitan amb la participacion dels principals musicians, ostals d’edicion e actors màgers de la cultura d’Occitània entièra, de las Valadas fins a l’ocean e d’Aran fins al Creissent.

A mai de se batre per recobrar lo festenal occitan de referéncia, la còla de La Gardarem es un brave testimoniatge del poder popular quand lo mond trabalhan amassa per protegir e preservar çò d’important per eles.

Ongan i aurà Estivada. La Nòv’Estivada remembrarà la glòria passada del festenal interregional de las culturas occitanas de Rodés e portarà de dignitat a la creacion culturala en occitan. Es ara mai important que jamai de sosténer l’eveniment e mostrar nòstre engatjament per la preservacion de nòstre eiretatge cultural, de nòstra identitat, qué.

 


Podètz sosténer l’organizacion de la Nòv’Estivada aicí: https://www.helloasso.com/associations/la-gardarem

 

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article