Actualitats
L’Estivada se consolida coma festenal de referéncia
“Dins l’edicion d’ongan, l’Estivada es venguda un festenal normal per un país que vòl èsser normal” (P. Roux)
Lo director de l’Estivada, Patric Roux, n’a fach lo bilanç per Jornalet. Roux a dich qu’ongan es arribat al resultat que desirava; “aquò’s un festenal de massas per la societat occitana”. S’en 2009 lo concèrt de Nadau amassèt qualques 8500 personas e l’an passat 12 000, ongan lo primièr concèrt, de Lou Seriol e Massilia Sound System, ja n’amassèt qualques 30 000.
Segon Roux, la serada mai polida foguèt aquela de divendres, quand malgrat la fòrta pluèja los espectators demorèron sus plaça. “Aquò s’era pas jamai passat e s’agís de quicòm de fòrt emotiu”, çò diguèt.
A prepaus del concèrt de Zebda, qu’es estat questionat per d'unes pr’amor que cantan en francés, Roux declarèt que “l’enemic es l’imperialisme francés, non pas la lenga francesa”. Al delà, lo directori de l’Estivada remarquèt Zebda, e mai canten en francés, es un grop d’Occitània engatjat amb lo país e amb la societat occitana.
Fin finala, en tot valorar la collaboracion de la Generalitat de Catalonha, Roux a confessat qu’ongan la crisi a limitat la siá aportacion de sòus e a tanben planhut que lo Conselhièr de Cultura, Ferran Mascarell, aja pas pogut venir a l’Estivada pr’amor de las siás obligacions al Parlament catalan.
“Venètz nos 'afranchir' de çò qu’es un festenal folclorista”, çò disiá Roux a la còla de Jornalet. Cresèm qu’a plan capitat.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Aquí mon bilanç d'espectator de basa :
Punts positius :
-Grande fèsta populara occitana conviviala
-Organizacion globalament remarcabla, per exemple dins l'adodament de la Val de Borran
-Integracion agradiva del festenal a la vila, per çò qu'es dels luòcs d'espectacle del còr de vila
-Tot agratís, çò qu'es de presar en temps de crisi
-Afluéncia fòrta, illustracion de la massificacion de la cultura occitana et de la capitada del festenal
Per tot aquò devem totes grandmercejar los organizators, qu'an fach un brave trabalh.
Punts negatius :
-Los organizators de còps que i a despassats per l'afluéncia (en còr de vila)
-Lo siti de Borran tròp aluenhat e destacat dels altres luòcs d'espectacle
-Una programacion qu'es la d'un festenal occitanista mai que d'un festenal de cultura occitana, e que revèrta pas tota la diversitat e la cultura de la societat occitana qu'es majoritariament fòra l'occitanisme (risc d'embarrament occitanista)
-Cò mai grèu es l'utilizacion quasi sistematica del Francés davant un public totalament occitanofòn de la part dels actors occitans
→ espectacles de còntes als dos tèrces en Francés
→ cantaires que cantan en occitan e fan sos comentaris en Francés entre cada cançon
→ l'Occitan ten pas que tres minutas dins las conferéncias e discutidas dins la boca d'Occitanistas afogats...
Los organizators devon faire quicòm per contrar aquela tendéncia (faire signar una carta de l'utilizacion de l'Occitan ?)
-Una afluéncia plan fòrta
30 000 per Massilià , es una evalucion rasonabla o es uflat ?
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari