editorial
Anem Òc!
Lo Collectiu Occitan reclama una granda manifestacion per l’occitan, çò publicàvem dimècres passat. Lo collectiu qu’amassa un desenat de movements occitanistas concluguèt a Montsegur que caliá reünir los esfòrces e organizar tornarmai una granda mobilizacion per la lenga.
Davant aquela anóncia, Jornalet anóncia tre ara son sosten incondicional a l’organizacion e la convocacion de la manifestacion. E quand disèm "incondicional", volèm dire que nos enchauta pas qual convocarà, nos enchauta pas qual serà la devisa de la manifestacion, nos enchauta pas la vila que se causirà (e mai nòstra predileccion per Marselha), nos enchauta pas la data ont se tendrà e nos enchauta pas qual i parlarà. Çò que nos impòrta plan, e çò que consideram vertadièrament central, es que la manifestacion se faga e que siá una reüssida de las bèlas perque la majoritat de personas a qui s’adreiçarà la manifestacion (los ciutadans en general, los elegits, los opinants, los jornalistas, los partits franceses, etc.) ne faràn una lectura positiva o negativa en foncion de la capacitat de mobilizacion. Alavetz, se l’occitanisme capita a tornar organizar una granda manifestacion per l’occitan, nos trobarem davant una bona escasença de tombar pas dins las abitualas luchas intèrnas mas de far una demostracion de fòrça civica, revendicativa, festiva, democratica e pacifica. Lo succès dependrà solament de nosautres.
Aquò dich, e per contribuir a assegurar que la manifestacion siá un fach e mai capite ben, aqueste jornal se met a la disposicion del movement occitanista per ajudar a l’organizacion, a la promocion, per ne parlar e per èsser un nautparlador de totas las iniciativas restacadas.
Las manifestacions per l’occitan, organizadas dempuèi 2005 pel collectiu “Anem, òc!” an aguda una importància istorica e an mes en evidéncia que d’occitanistas de drecha e d’esquèrra, d’ecologistas e de partisans de l’energia nucleara, d’atèus e de catolics, de rics e de paures, de pacifistas e de militaristas, de personas simpaticas e antipaticas... avèm agut mostrat totes que sèm capables d’agir amassa e ensems per çò mai considerable: salvar la lenga e la cultura del país, e far avançar Occitània per que recobre sa lenga, sa cultura e l’enveja de marchar a son aise... doncas, de “viure al país”. La darrièra manifestacion per l’occitan se tenguèt a Monpelhièr en octòbre de 2015.
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Las manifestacions que son estadas complidas an mes en evidéncia que d'esquerristas atèus e de dreitistas catolics, mas tanben d'anarquistas crestians de ges de biais ni catolics ni estalinians ni mai socialistas de dreita (coma es de mòda despuèi 1983), avèm agut mostrat totes que sèm capables d’agir amassa !
Es fin mai pas tròp de voler far una manifestacion per l'occitan.
La revòlta se fai benleu auver dins la societat mas d'aqui a se revoltar per l'occitan i a un monde. D'un autre biais en botant tot lo monde dins lo mesme cròs, l'òm vai se far recuperar la manifestation per far lo contrari de çò que reclaman.
Alaidonc pensam sur qual eslogan quò pòd se far: "la revòlta de las provinças contre lo centralisme parisien, la manifestacion per reclamar una revista de l'istòria de França, la revòlta de Jacqou lo croquant per defendre l'onor daus paisans o de D'artagnan simbòle de l'occitan partit a Paris per far lo val de Lois XIV. Anar a Paris per redressar e sauvar lo bateu França?...o autre
Fau partir dau principi que lo poder de Paris es acabat. Dins aquela condicions totas las ipotesas de revòlta van surgir, los uns per aquò, los autres per autra causa tant e tant qu'i aura pas de possibilitar d'unifiar dau mens dins un prumier temps.
Avem en tant qu'occitanistre un brave problem: l'unitat de l'occitan plan secoduda per un regionalisme que pus degun pus vòl. Mesfiam- nos que nòstre ennemic, l'ennemic de tots a la possibiltat emben l'argent de far bascular la revòlta dins una guerra civila violenta en dressant la Provinça contre Paris.
Au contrari de cò que daus uns an pus dire la lenga occitana unifia pas mas es una arma de division entre las regions occitanas. Quitam nòstre biais de pensar coma un professor per pensar.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari