Bandièra01 capçalera  1180x150: Novestivada

editorial

Solidaritat amb Mireia Boya

L'afar dels presonièrs politics catalans es a passar l'òsca cada jorn. Luènh de s'apasimar, la repression de l'estat espanhòl contra los elegits que simplament complisson lors engatjaments politics es a créisser de mai en mai. A l’ora d’ara, son en preson los dos presidents de las associacions independentistas, Jordi Cuixart e Jordi Sànchez; lo vicepresident de la Generalitat de Catalonha, Oriol Junqueras, e lo conselhièr de l’Interior, Joaquim Forn. En mai d'aquò, i a tant d'autres elegits en exili, dont lo quite president legitim de la Generalitat de Catalonha, Carles Puigdemont, e d'autres meses en libertat jos caucion, dont l'èx-presidenta del Parlament de Catalonha, Carme Forcadell. Ara la lista dels represalhats s’alonga, e pel primièr còp tòca una ciutadana occitana: l'èx-deputada aranesa Mireia Boya.
 
Quand intrèt coma deputada al Parlament de Catalonha, Mireia Boya, s'engatgèt per l’independéncia, lo drech de decidir d’Aran, la politica sociala e la nacion occitana. Es a dire qu’al programa electoral de la CUP, que compliguèt escrupulosament, Boya apondèt la revendicacion occitanista. Gaireben tot l'occitanisme èra estrambordat amb son eleccion, e ela nos raportava son activitat al Parlament.
 
Nos a pas decebuts. Demest d’autras causas, Boya a reüssit a far que tot lo combat estrambordant per la nòva republica se realize en catalan e occitan e, mai qu’aquò, se realize a la catalana e a l’occitana. En revendicant l’oficialitat de la lenga nòstra, l'èx-deputada occitana a obtengut de portar la revendicacion occitanista a tot aquel procès, que l’a divulgada de biais màger. Al referendum del 1r d’octòbre los bulletins de vòte èran en occitan, e a l’ora d’ara es de mai en mai normal de trobar de drapèls occitans dins las manifestacions, e que se cante los imnes catalan e occitan dins cèrts actes politics.
 
Ara, fòra son activitat parlamentària, nòstra Mireia es luènh de se sometre a la paur de la repression, coma sembla que se passa en çò de qualques elegits (que n'an drech). Al contrari, ela contunha de menar una activitat politica e sociala en Catalonha e tanben en Occitània, ont parla totjorn net e clar, en occitan e en quina lenga adeqüata que siá. La vegèrem a Narbona, a Montpelhièr, a Baiona... ara la veirem davant un jutge que l'acusa de rebellion per aver complits sos engatjaments electorals.
 
La còla de Jornalet vòl mostrar tot son sosten a Mireia Boya e la mercejar pel trabalh efectuat. En mai d'aquò, volèm estendre nòstra solidaritat amb totes los presonièrs politics e los enseguits en justícia per aver complit lo mandat del pòble, e amb totes los que se baton e se son batuts per la libertat e la democracia.



abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gerard Cairon Florentin d Albigés
9.

Un pauc estonant :
1-Mon comentari d'auèi, 8h30 empr'aqui, a desaparegut, I criticavi, d'un biais sarcastic mas educat, la participacion plan flaca dels lectors del JORNALET a la signatura de sosten a Mirelha Boya;
2-E vesi que tanben a desapareguda, la lista pietadosament plan tèuna de los qu'avian signat.....en seguida de la crida de nòstre car Jornalet....
Qual sap s'aurem d'explicas.....? !

  • 0
  • 0
Gerard Cairon Florentin d Albigés
8.

Un pauc estonant :
1-Mon comentari d'auèi, 8h30 empr'aqui, a desaparegut, I criticavi, d'un biais sarcastic mas educat, la participacion plan flaca dels lectors del JORNALET a la signatura de sosten a Mirelha Boya;
2-E vesi que tanben a desapareguda, la lista pietadosament plan tèuna de los qu'avian signat.....en seguida de la crida de nòstre car Jornalet....
Qual sap s'aurem d'explicas.....? !

  • 0
  • 0
obsevánd lo mond pp-cc-
7.

catalonya volía conseguir la independenci amb la força de la raó, espanya ho ha impedit amb la raó de la força.

  • 3
  • 0
P. Amar
6.

#5
Segur, segur:
http://paisnostre.midiblogs.com/archive/2017/09/25/catalonha-alerta-de-mireia-boya-contra-la-repression-de-madr-873247.html
https://www.vilaweb.cat/noticies/les-nou-claus-per-entendre-lanunci-del-referendum-de-l1-doctubre/
e met Macarèl a l'onor...

  • 2
  • 0
Al parlament, en occitan ( e catalan)
5.

#3 òc, mas se l'occitan es oficial en Catalonha sud tota, comprendi pas la rason per qu'una occitana parle catalan o castelhan, se pensam l'estat de santat de la lenga nostra. Coma un catalan a de pas parlar jamai publicament en castelhan dedins los Paises Catalans (pensi en las comarcas xurras). E un catalan li cal parlar occitan tostemps que trape un occitan. Cresi que los parlants de las lengas mai fòrtas son tostemps los que cal que parlen la lenga amb un estat pus grave de santat. Se los occitans parlan pas tostemps en occitan en lo Parlament que reconeish lo drech a lo parlar, qui lo parlara? Plan de gent coneish Mireia Boya en Catalonha, mas pas tot lo monde se n'es envisat, que es occitana.. ço es lo problema..

  • 0
  • 18

Escriu un comentari sus aqueste article